កាណាដាដាក់តំបន់ភាគខាងលិចប្រទេសក្នុងភាពអាសន្នទឹកជំនន់
ក្រោយរងគ្រោះទឹកជំនន់ នៅក្នុងបណ្តាក្រុងជាច្រើន យ៉ាងធ្ងន់ធ្ងរមក កាណាដាបានសម្រេចប្រកាសអាសន្ន ដាក់តំបន់ប៉ែកខាងលិចនៃប្រទេស ក្នុងភាពអាសន្នទឹកជំនន់ និងបានជម្លៀសប្រជាពលរដ្ឋរាប់ពាន់នាក់។ រដ្ឋាភិបាលកាណាដាបានថែមទាំងសម្រេចបញ្ចេញទ័ពមកដាក់ពង្រាយជាជំនួយទៀតផង។
ចុះផ្សាយនៅថ្ងៃ៖
ស្តាប់ - ០១:៤៩
បន្ទាប់ពីរងអាកាសធាតុក្តៅហួតហែងខ្លាំង ឡើងដល់៤៩,៩អង្សា កាលពីរដូវប្រាំង តាំងពីថ្ងៃអាទិត្យមក ទឹកភ្លៀងបានហូរធ្លាក់យ៉ាងខ្លាំងមិនធ្លាប់មាន លើតំបន់ប៉ែកខាងលិចកាណាដា បណ្តាលឱ្យមានទឹកជំនន់ ការហូរបាក់ដី សម្លាប់មនុស្សយ៉ាងហោចណាស់ម្នាក់ និងបាត់ខ្លួនបួននាក់។ កន្លែងកន្លះ កម្ពស់ទឹកភ្លៀងតែមួយថ្ងៃ ស្ទើរស្មើភ្លៀងមួយខែ។ ទឹកជំនន់បានបំផ្លាញជាពិសេសចម្ការកសិកម្ម ដោយកសិដ្ឋានរាប់រយត្រូវខូចខាត សត្វពាហនៈរាប់ម៉ឺនក្បាលបានងាប់។ ផ្លូវថ្នល់ត្រូវកាត់ផ្តាច់ ឬបិទ ចរាចរណ៍ផ្លូវដែកភ្ជាប់ទៅកំពង់ផែVancouver ត្រូវផ្អាក បានរំខានបណ្តាញផ្គត់ផ្គង់ប្រទេសយ៉ាងខ្លាំង។
បើតាមអភិបាលខេត្ត នេះជាភស្តុតាងដ៏ច្បាស់លាស់មួយទៀតនៃផលវិបាកបង្កឡើងដោយការប្រែប្រួលអាកាសធាតុ និងដោយទង្វើរបស់មនុស្ស។ ប្រឈមនឹងរលករាតត្បាតសុខភាពសាធារណៈដ៏ធ្ងន់ធ្ងរផង គ្រោះរាំងស្ងួត និងភ្លើងឆេះព្រៃដ៏កំណាចកាលពីខែក្តៅផង ឥលូវត្រូវប្រឈមនឹងគ្រោះទឹកជំនន់ទៀត ដូច្នេះកាណាដាត្រូវតែចាត់វិធានការបន្ទាន់ដាក់ តំបន់ក្នុងភាពអាសន្ន។
តាមរយៈវិធានការដាក់ខេត្តខាងលិចក្នុងភាពអាសន្ន ការស្តារនិងស្ថាបនាផ្លូវថ្នល់ដែលខូចខាតដោយទឹកជំនន់ និងបិទអស់ជាច្រើនថ្ងៃមកហើយ នឹងបានលឿនរហ័ស។ ក្នុងរយៈពេល១៤ថ្ងៃ យ៉ាងតិច រដ្ឋាភិបាលបានណែនាំមិនឱ្យមានការធ្វើដំណើរបម្លាស់ទីមិនចាំបាច់ ដោយផ្តល់អាទិភាពដល់តែការដឹកជញ្ជូនសំខាន់ៗ សេវាសុខាភិបាល និងសុខភាពបន្ទាន់។
ថ្ងៃនេះមេឃចាប់ស្រលះបន្តិចវិញហើយ។ នាយករដ្ឋមន្ត្រីកាណាដា បានសន្យាជួយស្ថាបនាតំបន់ឡើងវិញពីគ្រោះអាកាសធាតុដ៏កំណាចនេះ ដោយបានថែមទាំងប្រកាសបញ្ចេញកងកម្លាំងទ័ពអាកាស ប្រមាណជាង១ពាន់នាក់ ដើម្បីមកជួយធ្វើប្រតិបត្តិការជម្លៀសប្រជាជន ដឹកស្បៀងអាហារ និងការពារពលរដ្ឋ នៅក្នុងតំបន់លិចទឹកនិងតំបន់បាក់ដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ