ការវាយប្រហារដោយកាំបិតសម្លាប់មនុស្សយ៉ាងហោច ១០នាក់ នៅកាណាដា
នៅកាណាដា ប៉ូលិសកំពុងបើកប្រតិបត្តិការតាមចាប់បុរស២រូប ដែលគេសង្ស័យថា ជាអ្នកដើរចាក់សម្លាប់មនុស្ស នៅក្នុងក្រុងចំនួន ២នៅភាគខាងលិចប្រទេស។ នៅក្រោយទទួលបានទូរស័ព្ទសុំជំនួយ កាលពីនៅថ្ងៃអាទិត្យ ប៉ូលិសកាណាដាបានចុះដល់ទៅសហគមន៍រស់នៅរបស់ជនជាតិដើម និងបានប្រទះឃើញសាកសពមនុស្ស១០នាក់ ចំណែក មនុស្សជាង១៥នាក់រងរបួស និងត្រូវបានគេដឹកយកទៅព្យាបាលនៅមន្ទីរពេទ្យ។ នាយករដ្ឋមន្រ្តីកាណាដា លោកJustin Trudeauចាត់ទុកការវាយប្រហារកាលពីថ្ងៃអាទិត្យថា ជាអំពើអាក្រក់ព្រៃផ្សៃ និងគួរឲ្យរន្ធត់បំផុត នៅកាណាដា។
ចុះផ្សាយនៅថ្ងៃ៖ កែប្រែថ្ងៃទី៖
តាំងពីថ្ងៃអាទិត្យ ប៉ូលិសកាណាដាតាមប្រមាញ់ចាប់ ជនសង្ស័យ២នាក់ ដែលបានចាក់សម្លាប់មនុស្ស យ៉ាងហោច ១០នាក់ នៅទីក្រុងដាច់ស្រយាលចំនួន ២នៅភាគខាងលិចកាណាដា។ នៅក្រោយ ទទួលទូរស័ព្ទសុំជំនួយបន្ទាន់ នៅព្រឹកព្រលឹមថ្ងៃអាទិត្យ ប៉ូលិសបានចុះទៅដល់សហគមន៍ជនជាតិដើម នៅទីក្រុងJames Smith Cree Nation និងWeldon ជាទីដែលគេរកឃើញសាកសពមនុស្ស១០នាក់ ចំណែកមនុស្ស១៥នាក់ផ្សេងទៀតរងរបួស។
តាមស្នងការរងប៉ូលិសជាតិកាណាដា លោកស្រី Rhonda Blackmore នៅក្នុងការស៊ើបអង្កេត គេរកឃើញ មានកន្លែងឃាតកម្ម ចំនួន ១៣។ ជាមួយគ្នានោះ គេបានកំណត់អត្តសញ្ញាណជនសង្ស័យ២រូប អាយុ ៣០ និង៣១ឆ្នាំ ដែលគេជឿថា បានរត់គេចខ្លួនជាមួយរថយន្តម៉ាក នីសាន់ មួយគ្រឿង។
នៅក្នុងសារទ្វីតកាលពីថ្ងៃអាទិត្យ នាយករដ្ឋមន្រ្តីកាណាដា លោកJustin Trudeau បានបរិហារចាត់ទុកការចាក់សម្លាប់មនុស្សជាខែ្ស កាលពីថ្ងៃអាទិត្យ ថា ជាអំពើឃោឃៅ និងគួរឲ្យរន្ធត់បំផុត។ លោកបានសំដែងផងដែរ ការចូលរួមរំលែកទុក្ខជាមួយគ្រួសារជនរងគ្រោះ និងអ្នករបួស កាលពីថ្ងៃម្សិលមិញ។
អាជ្ញាធរកាណាដាវាយតម្លៃថា ជនរងគ្រោះមួយចំនួន អាចជាផ្ទាំងស៊ីបវាយប្រហារផ្ទាល់របស់ឧក្រិដ្ឋជន ចំណែក ជនរងគ្រោះមួយចំនួនផ្សេងទៀត អាចត្រូវឧក្រិដ្ឋជនចាក់សម្លាប់ ដោយចៃដន្យ។ យ៉ាងណាក៏ដោយ សម្រាប់ប៉ូលិសកាណាដា វានៅឆាប់ពេក ដើម្បីសន្និដ្ឋានពីមូលហេតុដែលធ្វើឲ្យជនសង្ស័យដើរចាក់សម្លាប់មនុស្ស នៅពេលនេះ។
លោកស្រី ស្នងការរងប៉ូលិសជាតិកាណាដាបានអះអាងថា ដោយបិទផ្លូវច្រកចេញចូលខេត្តSaskatchewan ប៉ូលិសនឹងប្រើគ្រប់មធ្យោបាយ ជាអតិបរមា ដើម្បីចាប់ខ្លួនជនសង្ស័យទាំងពីរ។ គិតនៅត្រឹមថ្ងៃអាទិត្យ ជនសង្ស័យទាំងពីររូបត្រូវបានគេឃើញដាននៅទីក្រុងRegina ដែលស្ថិតនៅចម្ងាយ៣០០គីឡូម៉ែត្រពីកន្លែងកើតហេតុ។ ប្រតិបត្តិការតាមប្រមាញ់ជនសង្ស័យ ត្រូវបានពង្រីកចូលទៅខេត្ត២ផ្សេងទៀត របស់កាណាដា ដែលមានទំហំផ្ទៃដីស្មើពាក់កណ្តាលទឹកដីអឺរ៉ុប។
នៅទីក្រុងកើតហេតុ Jame Smith Cree Nation ក្នុងខេត្តSaskatchewan ដែលមានប្រជាជន ជនជាតិដើម រស់នៅប្រមាណ ២៥០០នាក់ អាជ្ញាធរបានប្រកាសដាក់ក្រុងក្នុងស្ថានភាពអាសន្ន ដោយបានអំពាវនាវឲ្យប្រជាជនស្ថិតក្នុងផ្ទះ ដើម្បីសុវត្ថិភាព។
នៅប៉ុន្មានឆ្នាំចុងក្រោយនេះ កាណាដាបានជួបព្រឹត្តិការណ៍ដ៏ហិង្សាជាបន្តបន្ទាប់។ នៅខែ មេដា ឆ្នាំ ២០២០ ខ្មាន់កាំភ្លើងម្នាក់ ដែលតែងតួខ្លួនជាប៉ូលិសបានបាញ់សម្លាប់មនុស្ស១៦នាក់ នៅNouvelle-Ecosse។ នៅខែមករា ឆ្នាំ ២០១៧ មនុស្ស៦នាក់ស្លាប់នៅក្នុងការវាយប្រហារទៅលើវិហារអ៊ីស្លាមនៅ កេបិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ