នៅសហរដ្ឋអាមេរិក Shutdown ត្រូវបានបញ្ជៀស តែជាដំណោះស្រាយបណ្តោះអាសន្ន
នៅសហរដ្ឋអាមេរិក Shutdown ឬវិបត្តិថវិការបស់រដ្ឋសហព័ន្ធត្រូវបានបញ្ជៀសដោយសភា និងព្រឹទ្ធសភាបានឯកភាពគ្នាលើកិច្ចព្រមព្រៀងមួយនៅនាទីចុងក្រោយនាយប់ថ្ងៃសៅរ៍ ទី៣០ កញ្ញា។ ប្រធានាធិបតីលោកបៃដិនបានសាទរ និងបានស្នើឲ្យសភាទាំងពីរអនុម័តលើថវិកាសម្រាប់បន្តជួយអ៊ុយក្រែនដែលកំពុងប្រឈមនឹងសង្រ្គាមទល់នឹងរុស្ស៊ី។
ចុះផ្សាយនៅថ្ងៃ៖
ស្តាប់ - ០២:២៥
កិច្ចព្រមព្រៀងនេះត្រូវបានសភាបោះឆ្នោតអនុម័តដោយមានសំឡេងគាំទ្រចំនួន ៣៣៥សំឡេងទល់នឹងសំឡេងប្រឆាំងចំនួន ៩១សំឡេង។ ចំណែកការបោះឆ្នោតនៅព្រឹទ្ធសភាទទួលបានសំឡេងគាំទ្រចំនួន ៨៨សំឡេងទល់នឹងសំឡេងប្រឆាំងចំនួន ៩សំឡេង។ អ្វីជាការកត់សម្គាល់ កិច្ចព្រមព្រៀងមួយនេះនៅជាកិច្ចព្រមព្រៀងបណ្តោះអាសន្នដែលមានសុពលភាពត្រឹម ៤៥ថ្ងៃ និងគ្មានខ្ទង់ចំណាយសម្រាប់ជួយអ៊ុយក្រែនទេ។ គួរបញ្ជាក់ថា ខ្ទង់ចំណាយសម្រាប់អ៊ុយក្រែននេះជាឧបសគ្គចម្បងនៃការប្រទាញប្រទង់គ្នារវាងក្រុមអ្នកសាធារណរដ្ឋដែលមានសំឡេងភាគច្រើនក្នុងសភា និងក្រុមអ្នកប្រជាធិបតេយ្យរបស់ប្រធានាធិបតីលោកបៃដិន។
ក្រុមអ្នកសាធារណរដ្ឋ ពិសេសក្រុមអ្នកគាំទ្រលោកដូណាល់ ត្រាំបានប្រឆាំងដាច់ណាត់នឹងកិច្ចព្រមព្រៀងណាដែលមានខ្ទង់ចំណាយសម្រាប់ជួយអ៊ុយក្រែននៅក្នុងកញ្ចប់ថវិកាថ្មីរបស់រដ្ឋសហព័ន្ធ។ អ៊ីចឹងហើយបានជានៅក្នុងកិច្ចព្រមព្រៀងដែលបានប្រធានក្រុមសំឡេងភាគច្រើនអ្នកសាធារណរដ្ឋលោក Kevin McCarthy បានស្នើនៅនាទីចុងក្រោយ គឺដកខ្ទង់ចំណាយសម្រាប់ជួយអ៊ុយក្រែនចេញ។ លោក Hakeem Jeffries ប្រធានក្រុមសំឡេងភាគតិចអ្នកប្រជាធិបតេយ្យនៅសភាបានសាទរ និងចាត់ទុកកិច្ចព្រមព្រៀងបណ្តោះអាសន្ននេះជាការបោះមួយជំហានទៅមុខ។« យើងបានគេចផុតពី Shutdown ដែលចង់បានដោយក្រុមអ្នកគាំទ្រលោកដូណាល់ ត្រាំ ហើយយើងនឹងបន្តគាំទ្រផលប្រយោជន៍របស់ពលរដ្ឋអាមេរិក » នេះជាការការថ្លែងរបស់លោក Hakeem Jeffries។
ការសាទរក៏មានពីប្រធានាធិបតីលោកចូ បៃដិនដែរ។ តែអ្វីដែលលោកបៃដិនបានស្នើដោយទទូច គឺសុំឲ្យក្រុមអ្នកសាធារណរដ្ឋគិតគូរពីថវិកាសម្រាប់ជួយប្រទេសអ៊ុយក្រែនដែលកំពុងបន្តសង្រ្គាមតតាំងនឹងប្រទេសរុស្ស៊ី។ សរុបមក សហរដ្ឋអាមេរិកបានធូរទ្រូង និងបានគេចផុតពី Shutdown រយៈពេល ៤៥ថ្ងៃ។ តែគេនៅមិនទាន់ដឹងថានៅ ៤៥ថ្ងៃក្រោយមក តើសហរដ្ឋអាមេរិកនឹងអាចបញ្ចៀស Shutdown បានជាថ្មី ឬអត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ