លោកដូណាល់ ត្រាំ ត្រូវតុលាការផ្ដន្ទាទោសពិន័យជាប្រាក់ ៣៥៥លានដុល្លារ ពីបទក្លែងបន្លំហិរញ្ញវត្ថុ
តុលាការកំពូលរដ្ឋញូយ៉ក បានចេញសាលក្រមកាលពីថ្ងៃសុក្រ ទី១៦កុម្ភៈ កាត់ទោសលោកដូណាល់ ត្រាំ ដោយពិន័យជាប្រាក់ចំនួនប្រមាណ ៣៥៥លានដុល្លារ ពីបទក្លែងបន្លំហិរញ្ញវត្ថុនៅក្នុងអាណាចក្រក្រុមហ៊ុនអចលនទ្រព្យរបស់លោកគាត់។ សាលក្រមកាត់ទោសនេះ ត្រូវបានលោកដូណាល់ ត្រាំ រិះគន់បរិហារភ្លាមៗ ថាគ្មានការពិត និងជាឧបករណ៍នយោបាយដើម្បីធ្វើបាបរូបលោកតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០៣:០៧
ក្នុងសាលក្រមកម្រាស់៩២ទំព័រ លោក Arthur Engoron ចៅក្រមតុលាការកំពូលរដ្ឋញូយ៉ក បានសម្រេចហាមឃាត់លោកដូណាល់ ត្រាំ មិនឲ្យមានតួនាទីគ្រប់គ្រងក្រុមហ៊ុន ឬនីតិបុគ្គលណាទាំងអស់ ក្នុងរយៈពេល៣ឆ្នាំ នៅក្នុងរដ្ឋញូយ៉ក។ បន្ថែមពីនេះ លោកដូណាល់ ត្រាំ ត្រូវបង់ប្រាក់ពិន័យ ចំនួន ៣៥៤,៨៦ លានដុល្លារ។
សូមរំលឹកថា លោកស្រីអគ្គរដ្ឋអាជ្ញាប្រចាំរដ្ឋញូយ៉ក Letitia James បានដាក់ពាក្យប្តឹងចោទលោកដូណាល់ ត្រាំ កាលពីខែតុលាឆ្នាំ២០២២ ពីបទក្លែងបន្លំហិរញ្ញវត្ថុ។ ពាក្យបណ្តឹងនេះ បានចាប់បង្ខំឲ្យលោកដូណាល់ ត្រាំ ព្រមទាំងកូនប្រុសទាំង២នាក់ និងអាណាចក្រក្រុមហ៊ុន Trump Organization ត្រូវចូលខ្លួនក្នុងសវនាការរដ្ឋប្បវេណី ដែលចាប់ផ្តើមពីខែតុលា ដល់ខែមករាកន្លងទៅ ដោយបានទាមទារឲ្យភាគីជាប់ចោទ បង់ប្រាក់ពិន័យចំនួន ៣៧០លានដុល្លារ។
ភ្លាមៗក្រោយតុលាការកំពូលចេញសាលក្រម លោកដូណាល់ ត្រាំបានអះអាងថាលោកនឹងប្តឹងទាស់ ទៅតុលាការឧទ្ធរណ៍។ នៅក្នុងសារបង្ហោះលើបណ្តាញសង្គម Truth Social លោកត្រាំបានសរសេរថា គ្មានឡើងការក្លែងបន្លំហិរញ្ញវត្ថុ ដូចតុលាការចោទ ហើយផ្ទុយទៅវិញសាលក្រមនេះ គឺជាឧបករណ៍នយោបាយដើម្បីធ្វើបាបមកលើរូបលោកតែប៉ុណ្ណ។ លោកដូណាល់ ត្រាំ បានសរសេរបរិហារ ចោទលោកចៅក្រម Arthur Engoron និងលោកស្រីអគ្គរដ្ឋអាជ្ញា Letitia James ថាសុទ្ធតែជាមនុស្សពុករលួយដង្កូវស៊ី។
ដោយឡែក ផ្អែកតាមលោក Brian Quinn សាស្ត្រាចារ្យច្បាប់នៅ Boston College គឺទោះបីលោកដូណាល់ ត្រាំ សម្រេចប្តឹងទាស់ទៅតុលាការឧទ្ធរណ៍ក៏ដោយ តែវាមិនមែនមានន័យថា លោកត្រាំ អាចគេចវេស មិនបង់ប្រាក់ពិន័យ ៣៥៥លានដុល្លារ ក្នុងពេលនេះនោះទេ។
សូមបញ្ជាក់ថា លោកដូណាល់ ត្រាំ និងកូនៗ ត្រូវបានតុលាការរដ្ឋញូយ៉ក ចោទថាបានបំប៉ោងតួលេខហិរញ្ញវត្ថុ ក្នុងកំឡុងឆ្នាំ២០១០ ដល់២០២០។ យោងតាមការស៊ើបអង្កេត គឺលោកដូណាល់ ត្រាំ បានបំប៉ោងតួលេខតម្លៃទ្រពសកម្ម របស់ក្រុមហ៊ុន Trump Organization ជាក់ស្តែងដូចជា តម្លៃអគារTrump Tower តម្លៃសណ្ឋាគារប្រណិត ឬតម្លៃក្លឹបវាយកូនហ្គោលជាដើម ដើម្បីទទួលបានប្រាក់កម្ចីកាន់តែច្រើនពីធនាគារ និងបានទទួលលក្ខខណ្ឌធានាដ៏ប្រសើរ ពីសំណាក់ក្រុមហ៊ុនធានារ៉ាបរង។
ជាឧទាហរណ៍ អគ្គរដ្ឋអាជ្ញារដ្ឋញូយ៉ក បានបង្ហាញភស្តុតាងយ៉ាងច្បាស់ថា នៅរវាងពីឆ្នាំ២០១៤ ដល់ឆ្នាំ២០២១ ក្រុមហ៊ុនលោកដូណាល់ ត្រាំ បានបំភ្លើសតួលេខទ្រព្យសកម្ម ចំនួនពី ៨១២លានទៅ ២២០០លានដុល្លារ ក្នុងមួយឆ្នាំៗ។ ដោយសង្កេតឃើញ អំពើក្លែងបន្លំម្តងហើយម្តងទៀតនេះ លោកចៅក្រម Arthur Engoron ធ្លាប់បានសម្រេចជម្រះបញ្ជី បិទក្រុមហ៊ុនជាច្រើន ក្នុងបណ្តាញក្រុមហ៊ុនបុត្រសម្ព័ន្ធរបស់ Trum Organization។
កាលពីថ្ងៃសុក្រទី១៦កុម្ភៈ ក្នុងពេលប្រកាសសាលក្រម លោកចៅក្រម Arthur Engoron បានលើកឡើងថា ចំនួនទឹកប្រាក់ពិន័យនេះ គឺសក្តិសមណាស់ បើប្រៀបធៀបទៅនឹងអាកប្បកិរិយារបស់លោកដូណាស់ ត្រាំ និងកូនប្រុសទាំង២នាក់ ដែលក្រអឺតក្រទម មើលងាយប្រព័ន្ធយុត្តិធម៌ ហើយប្រកែកទាំងងងើល មិនទទួលស្គាល់កំហុសខ្លួន បើទោះបីមានភស្តុតាងយ៉ាងប្រត្យក្សក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ