ប្រេស៊ីលទទួលប្រមុខការទូតអាមេរិកចំពេលមានទំនាស់ការទូតជាមួយអ៊ីស្រាអែល
កិច្ចប្រជុំការទូតលើកដំបូងសម្រាប់ឆ្នាំ២០២៤ នៃក្រុមប្រទេសមានសេដ្ឋកិច្ចលូតលាស់ជាងគេ២០ដំបូងនៅលើពិភពលោក (ហៅកាត់ថាហ្សេ២០) ដែលចាប់បើកធ្វើនៅថ្ងៃពុធនិងព្រហស្បតិ៍នេះនៅប្រទេសប្រេស៊ីល ត្រូវគ្របដណ្តប់ដោយជម្លោះនៅអ៊ុយក្រែននិងនៅហ្កាហ្សា និងជាវេទិកាប្រឈមគ្នារវាងក្រុមលោកខាងលិចនិងរុស្ស៊ី។ នាឱកាសនេះ លោកលូឡា ប្រធានាធិបតីប្រេស៊ីល បានទទួលជួបលោកប្រមុខការទូតអាមេរិក អង់តូនី ប្លីងកិនដែលអញ្ជើញទៅបំពេញទស្សនកិច្ចនៅប្រេស៊ីលជាលើកទីមួយ។ ប៉ុន្តែជំនួបរវាងអ្នកទាំងពីរទំនងជាមិនសូវរលូន ព្រោះតែប្រេស៊ីលកំពុងមានវិបត្តិពាក្យសំដីជាមួយនឹងអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
សម្រាប់ប្រធានាធិបតីប្រេស៊ីល លោក លូឡា ដែលជាម្ចាស់ផ្ទះ ជំនួបប្រជុំហ្សេ២០ជាវេទិកាប្រកបដោយឥទ្ធិពលវិជ្ជមានបំផុតសម្រាប់ដោះស្រាយជម្លោះអន្តរជាតិនានា។
ប៉ុន្តែមហិច្ឆតាចង់ធ្វើអន្តរការីដោះស្រាយវិបត្តិពិភពលោករបស់លោកលូឡា កំពុងលិបបាត់ទៅវិញ ដោយកាលពីថ្ងៃអាទិត្យទី ១៨កុម្ភៈ លោកលូឡា បានបញ្ឆេះវិបត្តិការទូតដ៏សន្ធោសន្ធៅមួយជាមួយអ៊ីស្រាអែល។ លោកប្រធានាធិបតីប្រេស៊ីលបានចោទអ៊ីស្រាអែល ថាប្រព្រឹត្តអំពើប្រល័យពូជសាសន៍ប៉ាឡេស្ទីន និងបានប្រៀបប្រដូចប្រតិបត្តិការយោធាអ៊ីស្រាអែលលើតំបន់ហ្កាហ្សា ទៅនឹងសកម្មភាពរបស់ពួកណាហ្ស៊ីទៅលើជនជាតិជ្វីហ្វ។ ពាក្យសំដីឱ្យបានធ្វើឱ្យលោកលូឡា ក្លាយជាជនមិនទទួលស្វាគមន៍ពីអ៊ីស្រាអែល។ កាន់តែធ្ងន់ធ្ងរបន្ថែមមួយកំរិតទៀត នៅថ្ងៃអង្គារម្សិលមិញ រដ្ឋមន្ត្រីការបរទេសប្រេស៊ីលបានចោទសមភាគីអ៊ីស្រាអែលថានិយាយភូតកុហក។
ក្នុងពេលកំពុងមានវិបត្តិការទូតជាមួយអ៊ីស្រាអែលដ៏តានតឹង នៅថ្ងៃពុធទី២១កុម្ភៈនេះ ប្រធានាធិបតីប្រេស៊ីលបានទទួលជួបប្រមុខការទូតអាមេរិក ដែលជាគាំទ្រអ៊ីស្រាអែលទាំងផ្នែកយោធានិងការទូត។ សហរដ្ឋអាមេរិកទើបបានប្រើសិទ្ធិប្រឆាំងវេតូជាលើកទីបី នៅក្នុងក្រុមប្រឹក្សាសន្តិសុខអង្គការសហប្រជាជាតិច្រានចោលសំណើអំពាវនាវឱ្យមានបទឈប់បាញ់ជាបន្ទាន់នៅហ្កាហ្សា និងបទចោទប្រកាន់អ៊ីស្រាអែលប្រព្រឹត្តអំពើប្រល័យពូជសាសន៍។
ដូច្នេះជំនួបពិភាក្សារវាងលោកប្រធានាធិបតីប្រេស៊ីលលូឡា និងលោកប្រមុខការទូតអាមេរិក អង់តូនី ប្លីនកិន ច្បាស់ជាមិនស្វាហាប់ដូចការគ្រោងទុកទេ។ ក្រោយកិច្ចពិភាក្សានៅវិមានប្រធានាធិបតីប្រេស៊ីលរយៈពេលជិត៤៥នាទី ឥស្សរជនទាំងពីរមិនបានធ្វើសេចក្តីថ្លែងការណ៍អ្វីទាំងអស់នៅចំពោះមុខអ្នកសារព័ត៌មាន។
នេះជាលើកទីមួយហើយដែលលោក អង់តូនី ប្លីងកិន អញ្ជើញមកបំពេញទស្សនកិច្ច នៅប្រេស៊ីល តាំងពីទទួលតំណែងជាប្រមុខការទូតអាមេរិកមក។ ទំនាក់ទំនងអាមេរិកប្រេស៊ីលទើបបានប្រសើរឡើងវិញបន្តិចក្រោយពីលោកលូឡាត្រលប់មកកាន់អំណាចវិញនៅឆ្នាំ២០២៣ប៉ុណ្ណោះ។ ប្រមុខដឹកនាំទាំងពីរមានមហិច្ឆតាដូចគ្នា ក្នុងការការពារតម្លៃនៃលទ្ធិប្រជាធិបតេយ្យ សិទ្ធិពលករ និងក្នុងការប្រយុទ្ធប្រឆាំងនឹងការប្រែប្រួលអាកាសធាតុ។
ប៉ុន្តែអាមេរិកនិងប្រេស៊ីលក៏មានជំហរបញ្ច្រាសគ្នាច្រើនដែរ មានជាអាទិ៍សំណុំរឿងសង្គ្រាមអ៊ុយក្រែន ឬវិបត្តិផ្ទៃក្នុងវេណេស៊ុយអេឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ