អាមេរិកត្រលប់ទៅព្រះចន្ទវិញយ៉ាងជោគជ័យ ជាមួយនឹងយានរបស់ក្រុមហ៊ុន Intuitive Machines
យានស្ទង់មួយរបស់ក្រុមហ៊ុនអាមេរិក Intuitive Machines បានចុះចតយ៉ាងជោគជ័យ នៅលើព្រះចន្ទ។ គឺជាបេសកកម្មសហការជាមួយទីភ្នាក់ងារអវកាសអាមេរិក NASA ដើម្បីស្រាវជ្រាវនៅប៉ូលខាងត្បូងរបស់ព្រះចន្ទ ដែលគេជឿថាមានទឹកកក។ ជោគជ័យនេះ គឺជាការបោះជំហានត្រលប់ទៅព្រះចន្ទវិញ ជាលើកដំបូង សម្រាប់សហរដ្ឋអាមេរិក បន្ទាប់ពីបេសកកម្មអាប៉ូឡូ ត្រូវបានបិទបញ្ចប់នៅឆ្នាំ១៩៧២។ ហើយក៏ជាលើកដំបូងដែរ ដែលយានរបស់ក្រុមហ៊ុនឯកជន អាចចុះចតបាននៅលើព្រះចន្ទ។
ចុះផ្សាយនៅថ្ងៃ៖
ស្តាប់ - ០៣:១៥
ថ្ងៃទី២២កុម្ភៈ នៅវេលាម៉ោង ៥និង២៣នាទី ម៉ោងនៅហ៊ូស្តុន រដ្ឋតិចសាស់ យាន Nova-C របស់ក្រុមហ៊ុនអាមេរិក Intuitive Machines បានចុះចតដោយជោគជ័យ នៅចំងាយប្រមាណ៣០០គីឡូម៉ែត្រ ពីប៉ូលខាងត្បូងរបស់ព្រះចន្ទ។ Intuitive Machines បានបញ្ជាក់ថា យាននេះបានចុះចត ឈរនឹងដូចការគ្រោងទុក ហើយបានចាប់ផ្តើមបញ្ជូនទិន្នន័យ និងរលកសញ្ញាមកឲ្យហើយ។
មានល្បឿន ១៨០០ម៉ែត្រក្នុងមួយវិនាទី ពេលចូលកៀកទៅព្រះចន្ទ តែមុនពេលចុះចតចំនួនជាង១០នាទី យាន Nova-C បានបាញ់កម្លាំងហោះទប់ ដើម្បីចុះដោយសន្សឹមសន្សឹមបំផុត។ ក្រុមការងារនៃបេសកកម្ម Odysseus របស់ក្រុមហ៊ុន Intuitive Machine កំពុងរងចាំរូបភាពដែលយាននេះនឹងផ្ញើរមកឲ្យ ដោយក្នុងនោះគឺមានរូបភាពចុះចត ថតដោយកាមេរ៉ាពិសេសមួយ ស្ថាបនាដោយ សកលវិទ្យាល័យ Embry-Riddle ដែលបានលោតចេញពីយានមិនពេលចុះចតបន្តិច។
គួរបញ្ជាក់ថា ក្រោយបេសកកម្មរបស់យានApollo នៅឆ្នាំ១៩៧២ គឺអាមេរិកមិនដែលបានបញ្ជូនយានណាមួយ ទៅចុះចតនៅលើព្រះចន្ទទៀតទេ។ ជោគជ័យរបស់យាន Nova-C នាពេលនេះ គឺជាការបើកទំព័រថ្មី ដែលសហរដ្ឋអាមេរិកបានត្រលប់ទៅព្រះចន្ទវិញ។ ហើយក៏ជាលើកទី១ដែរ ដែលក្រុមហ៊ុនឯកជន អាចមានសមត្ថភាពចុះចតយានដោយជោគជ័យ នៅលើព្រះចន្ទបែបនេះ។ ថ្មីៗនេះ ឥណ្ឌា និងជប៉ុន បានចុះចតយានរបស់គេដោយជោគជ័យដែរ នៅលើព្រះចន្ទ តែជាយានរបស់ទីភ្នាក់អវកាសជាតិ។ កន្លងមក មានក្រុមហ៊ុនឯកជនជាច្រើន មានទាំងអ៊ីស្រាអែល អាមេរិក ជប៉ុនជាដើម បានព្យាយាមបង្ហោះយានទៅចុះចតនៅលើព្រះចន្ទដែរ តែមិនបានជោគជ័យ។
សូមបញ្ជាក់ថា យាន Nova-C របស់ ក្រុមហ៊ុន Intuitive Machines មានកំពស់ជាង៤ម៉ែត្រ បំពាក់ដោយឧបករណ៍ស្រាវជ្រាវវិទ្យាសាស្ត្រ របស់Nasa ចំនួន៦។ ក្រុមហ៊ុន Intuitive Machines ត្រូវបានទីភ្នាក់ងារ Nasa សម្រេចជ្រើសរើស ប្រគល់ឲ្យធ្វើបេសកកម្មនេះ ក្នុងតម្លៃទឹកប្រាក់ចំនួន១១៨លានដុល្លារ ដើម្បីស្រាវជ្រាវលំអិតនៅប៉ូលខាងត្បូងនៃព្រះចន្ទ។ ក្នុងចំណោម ឧបករណ៍ស្រាវជ្រាវវិទ្យាសាស្ត្រទាំង៦ គឺមានឧបករណ៍សិក្សាអំពីស្រទាប់ប្លាស្មាព្រះចន្ទ ដែលជាស្រទាប់ឧស្ម័នមានផ្ទុកចរន្តអគ្គីសនី និងឧបករណ៍សម្រាប់វាស់កម្រិតរលកវិទ្យុ មកពីព្រះអាទិត្យ និងពីភពផ្សេងទៀត។
គួរបញ្ជាក់ដែរថា ទីតាំងចុះចតរបស់យាន Nova-C ស្ថិតនៅ៣០០គីឡូម៉ែត្រពីប៉ូលខាងត្បូងរបស់ព្រះចន្ទ ជាតំបន់បាតខ្ទះដែលគេដាក់ឈ្មោះថា Malapert A។ គឺតំបន់នេះហើយ ដែលអ្នកវិទ្យាសាស្ត្រកំពុងចាប់អារម្មណ៍ខ្លាំង ព្រោះគេបានឃើញថាមានទឹកកក។ ទីភ្នាក់ងារ Nasa មានគម្រោងបញ្ជូនមនុស្សទៅព្រះចន្ទ នៅរវាងឆ្នាំ២០២៦ ក្នុងបេសកកម្មArtémis។ គឺក្នុងក្របខណ្ឌបេសកកម្មនេះហើយ ដែលNasa ចង់សិក្សាឲ្យបានច្បាស់អំពីតំបន់ខាងត្បូងព្រះចន្ទនេះ។
យោងតាមលោក Joel Kearns អ្នកទទួលបន្ទុកម្នាក់នៅNasa គឺគេគ្រោងស្រាវជ្រាវនៅតំបន់នេះ អំពីស្រទាប់ដី និងល្អងធូលី ហើយថាតើតំបន់នេះ ក្តៅឬត្រជាក់កម្រិតណា និងមានកម្រិតវិទ្យុសកម្មប៉ុណ្ណាដែរ។ ទាំងអស់នេះ គឺសុទ្ធតែជាការស្រាវជ្រាវដ៏ចាំបាច់ មុននឹងអាចសម្រេចបញ្ជូនមនុស្សទៅកាន់ទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ