លោក ត្រាំ ឈ្នះសំឡេងនាំមុខក្នុងរដ្ឋ៣ទៀត នៅ៣ថ្ងៃមុនបោះឆ្នោត Super Tuesday
នៅសហរដ្ឋអាមេរិក លោកអតីតប្រធានាធិបតី ដូណាល់ ត្រាំ បានទទួលជ័យជម្នះនាំមុខនៅរដ្ឋ៣ទៀត នៅថ្ងៃសៅរ៍ ទី២មីនា។ ពោលគឺនៅ៣ថ្ងៃមុនការបោះឆ្នោត Super Tuesday ដើម្បីក្លាយជាបេក្ខជនផ្លូវការ តំណាងឲ្យបក្សសាធារណរដ្ឋ សម្រាប់ការបោះឆ្នោតប្រធានាធិបតីអាមេរិក ក្នុងខែវិច្ឆិកា ឆ្នាំ២០២៤។ តាមរយៈការឈ្នះសំឡេងអង្គបោះឆ្នោតក្នុងរដ្ឋ៣ថែមទៀតចុងសប្តាហ៍នេះ បង្ហាញឲ្យឃើញកាន់តែច្បាស់ថា លោក ត្រាំ ទំនងជានឹងឈ្នះគូប្រជែង លោកស្រី នីកគី ហាឡី ហើយនិងក្លាយជាអ្នកតំណាងបក្សសាធារណរដ្ឋជាផ្លូវការ ដើម្បីប្រកួតប្រជែងនឹងលោក ចូ បៃដិន អ្នកតំណាងគណបក្សប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០៣:៣៤
ពន្លឺនៃក្តីសង្ឃឹម កាន់តែភ្លឺច្បាស់ ចំពោះលោក ដូណាល់ ត្រាំ ដើម្បីក្លាយជាបេក្ខជនប្រធានាធិបតីតំណាងតែមួយគត់របស់គណបក្សសាធារណរដ្ឋ។ ពន្លឺកាន់តែភ្លឺច្បាស់ ដ្បិតថា អតីតប្រធានាធិបតីរូបនេះ បានវ៉ាដាច់ផ្តួនៗលើគូប្រជែងក្នុងបក្សតែមួយ គឺលោកស្រី នីកគី ហាឡី ដែលធ្លាប់ធ្វើជា ឯកអគ្គរដ្ឋទូតអាមេរិក ប្រចាំអង្គការសហប្រជាជាតិក្នុងអាណត្តិដឹកនាំរបស់លោក ត្រាំ។
ក្នុងរដ្ឋមីសស៊ូរី ពីថ្ងៃសៅរ៍ ទី២មីនា លោក ត្រាំ ឈ្នះដាច់លោកស្រី ហាឡី ហើយនៅឱកាសជួបមីទ្ទីញជាមួយអ្នកគាំទ្រជាង ២ពាន់នាក់ ក្នុងរដ្ឋមីឈីហ្កាន់ លោក ត្រាំ ក៏បានទាក់ចិត្តអង្គតំណាងបោះឆ្នោតដល់ទៅ ៣៩ បន្ថែមលើ ១៦ ដែលបានគាំទ្ររូបលោកស្រេចទៅហើយ កាលពីដើមសប្តាហ៍។ បណ្តាញសារព័ត៌មានអាមេរិក នាំគ្នាភ្ញាក់ផ្ញើចាប់អារម្មណ៍ចុងផ្សាយសរុបតែម្តង ថា លោក ត្រាំ វ៉ាដាច់នាំមុខក្នុងរដ្ឋដល់ទៅ ៣ គឺរដ្ឋមីសស៊ូរី រដ្ឋមីឈីហ្កាន់ និងរដ្ឋអាយដាហូ។
ទីភ្នាក់ងារសារព័ត៌មានបារាំងអាអេហ្វប៉េ ក៏កត់សម្គាល់ដែរ ថា មកទល់ពេលនេះ លោក ត្រាំ ហាក់កំពុងតែនាំមុខច្រើន និងទទួលបានលទ្ធផលល្អស្ទើរតែគ្រប់រដ្ឋ។ ការទទួលសំឡេងឈ្នះដាច់ ដល់ទៅ៣ រដ្ឋ កាន់តែជំរុញឲ្យរូបលោក មានប្រៀបច្រើនខ្លាំង សម្រាប់ការបោះឆ្នោត នៅថ្ងៃអង្គារ ទី៥ មីនា ដែលគេហៅថា Super Tuesday។ បណ្តារដ្ឋចំនួន ១៥ រៀបចំបោះឆ្នោតរួមគ្នាក្នុងថ្ងៃតែម្តង ហើយជាទូទៅ Super Tuesday ជាថ្ងៃដែលកំណត់ជោគវាសនារបស់អ្នកតំណាងតែ១គត់របស់គណបក្ស។
ដើម្បីក្លាយជាបេក្ខជនប្រធានាធិបតីតំណាងតែមួយគត់ឲ្យគណបក្ស ត្រូវការសំឡេងគាំទ្រ យ៉ាងហោច ចំនួន ១ ២១៥ អង្គបោះឆ្នោត។ ពេលនេះ លោក ត្រាំ ទទួលបាន ជាង ២៤៤ ឈ្នះដាច់១០ដង ឆ្ងាយពីគូប្រជែង លោកស្រី នីកគី ហាឡី ដែលទទួលបានត្រឹមតែ ២៤ អង្គបោះឆ្នោត តែប៉ុណ្ណោះ។ នេះបើតាម របស់ ទីភ្នាក់ងារសារព័ត៌មានអាមេរិក Associated Press ដែលរាប់ត្រួសៗជាបណ្តោះអាសន្ន កាលពីថ្ងៃសៅរ៍។ ការស្ទង់មតិចុងក្រោយ នៅរដ្ឋការូលីនខាងត្បូង បញ្ជាក់ថា អ្នកគាំទ្របក្សសាធារណរដ្ឋ ដល់ទៅ ៤០% មិនគាំទ្រ មិនពេញចិត្តលោក ត្រាំ ទេ។ លោកស្រី នីកគី ហាឡី បានយកចំណុចនេះទៅរិះគន់លោក ត្រាំ ជាគូប្រជែងថា ៤០%នៃអ្នកស្រឡាញ់បក្សសាធារណរដ្ឋ មិនចង់បានលោក ត្រាំ តំណាងឲ្យពួកគេ នោះឡើយ។ ដូច្នេះ លោក ត្រាំ ជាបញ្ហា ទោះបីលោកមិនទទួលខ្លួនឯងក៏ដោយ។
គ្រានេះ លោក ដូណាល់ ត្រាំ ឈរនៅលើទីតាំងមានប្រៀបជាងគូប្រជែង។ បើតាមអ្នកជំនាញកិច្ចការអាមេរិក អ្វីដែលលោក ត្រាំ ប្រឈមមុខធំជាងគេ គឺពេលវេលា។ ពេលវេលាដែលត្រូវរំខានដោយបណ្តឹងផ្លូវច្បាប់ជាច្រើននៅតុលាការ និងដែលតម្រូវឲ្យរូបលោក ត្រូវធ្វើដំណើរផ្លាស់ទីចុះឡើងចេញចូលសាលាជម្រះក្តី ហើយរឿងក្តីក្តាំនៅតុលាការនេះ មិនមែនជាប្រផ្នូលល្អសម្រាប់អ្នកបោះឆ្នោតឡើយ។ ស្របពេលនោះ លោក ត្រាំ ត្រូវការពេលវេលាប្រមូលលុយមូលនិធិ និងពេលវេលាធ្វើមីទ្ទីញ ជួបជុំមនុស្ស សម្រាប់ឃោសនាថែមទៀត។ ក្នុងការឃោសនា ពីថ្ងៃសៅរ៍ ទី២មីនា លោក ដូណាល់ ត្រាំ បានបន្តឆ្លៀត រិះគន់ និង ចោទប្រកាន់ នយោបាយអន្តោប្រវេសន៍របស់លោក ចូ បៃដិន ថាគំរាមកំហែងដល់ប្រជាធិបតេយ្យអាមេរិក និងឃុបឃិតជាមួយបរទេសផ្តួលរំលំសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ