ចិនផ្តល់ហេតុផលនៃការចាប់ខ្លួនអតីតប្រមុខសាសនាកាតូលិក នៅហុងកុង
ដោយសំអាងលើច្បាប់សន្តិសុខជាតិ អាជ្ញាធរហុងកុងបានចាប់ខ្លួនសកម្មជនប្រជាធិបតេយ្យហុងកុងដ៏ល្បីល្បាញបួននាក់ ទាំងកណ្តាលអាធ្រាត្រយប់ថ្ងៃពុធឆ្លងចូលថ្ងៃព្រហស្បតិ៍ ក្នុងនោះមានម្នាក់ជាអតីតប្រមុខវិហារកាតូលិក វ័យ៩០ឆ្នាំ។ នៅល្ងាចថ្ងៃទី១២ឧសភា ដដែល ក្រោមសម្ពាធ និងប្រតិកម្មរបស់សហគមន៍អន្តរជាតិ ចិនបានចេញមកបំភ្លឺនិងបញ្ជាក់អំពីមូលហេតុនៃការចាប់ខ្លួននោះ។
ចុះផ្សាយនៅថ្ងៃ៖
ស្តាប់ - ០២:១៤
“ជនពាក់ព័ន្ធនឹងការចាប់ខ្លួន មានជាប់សង្ស័យពីបទផ្សំគំនិតជាមួយបរទេស ឬកងកម្លាំងបរទេស ដែលជាតំណាងគ្រោះថ្នាក់ដល់សន្តិសុខជាតិ-ជាកំហុសដ៏ធ្ងន់ធ្ងរ”។ នេះបើតាមសេចក្តីថ្លែងការណ៍របស់ការិយាល័យតំណាងក្រសួងការបរទេសចិននៅហុងកុង។ រដ្ឋាភិបាលហុងកុងបានបន្ថែមទៀតថា នាមជាបុព្វជិតមិនអាចជួយអ្វីបានទេ ព្រោះគ្មាននរណាម្នាក់អាចអង្គុយលើច្បាប់បានឡើយ។
សម្រាប់ចិន ជនទាំងបួន គឺ អតីតប្រមុខសាសនាកាតូលិក លោក Joseph Zen ហ្សូស្ហេ ហ្សេន អាយុ៩០ឆ្នាំ តារាចម្រៀង និងជាសកម្មជនគាំទ្រសិទ្ធិអ្នកស្រលាញ់ភេទដូចគ្នា Denise Ho មេធាវី Magaret Ng និងសាស្ត្រាចារ្យសាកលវិទ្យាល័យ Hui Po-Keung បានចូលរួមបង្កើតមូលនិធិមនុស្សធម៌ ៦១២ Humanitarian Relief ដើម្បីប្រមូលហិរញ្ញវត្ថុទៅជួយសកម្មជនប្រជាធិបតេយ្យដែលប៉ូលិសចាប់ខ្លួនបានក្នុងអំឡុងពេលផ្ទុះមហាបាតុកម្មប្រជាធិបតេយ្យកណ្តាលក្រុងហុងកុងឆ្នាំ២០១៩។ មូលនិធិនោះលែងមានរូបរាងហើយពេលនេះ។
គេចពីសៀងហៃមកហុងកុង នៅឆ្នាំ១៩៤៩ ពេលបក្សកុម្មុយនិស្តឡើងកាន់អំណាចនៅចិន សង្ឃ Joseph Zen បានក្លាយជាប្រមុខវិហារកាតូលិកនៅហុងកុង និងបានក្លាយជាឥស្សរជនការពារលទ្ធិប្រជាធិបតេយ្យដ៏ល្បីល្បាញ នៅអាស៊ី បន្ទាប់ពីធ្លាប់បានដឹកនាំធ្វើសកម្មភាពរិះគន់ច្បាប់ប្រឆាំងវិទ្ធង្សនារបស់បក្សកុម្មុយនិស្តចិនឆ្នាំ២០០៣ និងបានរិះគន់ដោយចំៗការតែងតាំងប្រមុខសាសនាកាតូលិកនៅចិន។ ប្រមុខសាសនាកាតូលិកនៅហុងកុងក្រោយៗ ពុំដែលហ៊ានវាយប្រហាររបបប៉េកាំងទេ។
បន្ទាប់ពីចាប់ខ្លួនអស់ពេញមួយថ្ងៃ នៅល្ងាចថ្ងៃព្រហស្បតិ៍ទី ១២ឧសភាដដែល អាជ្ញាធរហុងកុងបានដោះលែងឥស្សរជនទាំងបួន ឱ្យមានសេរីភាពជាបណ្តោះអាសន្ន និងដោយមានលក្ខខណ្ឌ តែរឹបអូសយកលិខិតឆ្លងដែនទុក។ ជាមួយបទចោទប្រកាន់បែបនេះ ជនទាំងបួន អាចនឹងត្រូវតុលាការកាត់ទោសឱ្យជាប់ពន្ធនាគារអស់មួយជីវិត។ គិតចាប់តាំងពីហុងកុងមានច្បាប់សន្តិសុខជាតិថ្មី នៅខែមិថុនា២០២០មក មានជនហុងកុងចំនួនជាង១៨០នាក់បានចាប់ខ្លួន។ ហើយជាទូទៅជនជាប់សង្ស័យមិនអាចសុំនៅក្រៅឃុំបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ