អូស្ត្រាលីនិងហ្វីលីពីនចាប់ដៃគ្នាធ្វើសមយុទ្ធក្បែរតំបន់ទឹកដែលចិនដណ្តើមទៅគ្រប់គ្រងកាលពី១០ឆ្នាំមុន
ហ្វីលីពីន និងអូស្ត្រាលីរៀបចំសមយុទ្ធរួមគ្នា ក្នុងទ្រង់ទ្រាយដ៏ធំ នៅក្នុងតំបន់ដែនទឹកជាប់ជម្លោះជាមួយចិន នៅសមុទ្រចិនខាងត្បូង។ សមយុទ្ធនៅថ្ងៃសុក្រទី ២៥សីហា ២០២៥ ដែលមានការចូលរួមពីកងទ័ពជើងគោក ជើងអាកាស និងជើងទឹករបស់ប្រទេសទាំងពីរប្រព្រឹត្តទៅក្រោមក្រសែភ្នែកតាមដានរបស់ប្រធានាធិបតីហ្វីលីពីន លោក ហ្វ៊ែរឌីណង់ ម៉ាកូស ជូញ៉រ និងរដ្ឋមន្រ្តីការពារជាតិអូស្ត្រាលី
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
សមយុទ្ធយោធាដ៏ធំលើកទី១ដែលហ្វីលីពីន ចាប់ដៃសហការជាមួយអូស្ត្រាលីប្រព្រឹត្តទៅ នៅមូលដ្ឋានទ័ពហ្វីលីពីននៅលើកោះLuçonដែលស្ថិតនៅចម្ងាយប្រមាណ២៣០គីឡូម៉ែត្រពីតំបន់ថ្មប៉ប្រះទឹក Scarborough។ ជាតំបន់ដែលសំបូរត្រី ធនធានធម្មជាតិ ថ្មប៉ប្រះទឹកScarboroughធ្លាប់ជាកន្លែងនេសាទរបស់ប្រជាជនហ្វីលីពីន មុននឹងត្រូវចិនរំលោភដណ្តើមយកទៅគ្រប់គ្រងដោយខុសច្បាប់អន្តរជាតិ កាលពីឆ្នាំ ២០១២។
សមយុទ្ធយោធា ក្នុងតំបន់ទឹកជាប់ជម្លោះជាមួយចិន នៅសមុទ្រចិនខាងត្បូង ជាលំហាត់សមយុទ្ធបែបធ្វើត្រាប់ ដែលផ្តោតទៅលើការវាយដណ្តើមយកមកវិញ ដីកោះដែលសត្រូវបានវាយចូលកាន់កាប់។ ជាមួយ យន្តហោះចម្បាំងដ៏ទំនើប ២គ្រឿង របស់អូស្ត្រាលី ដែលជាអ្នកធានាការពារដែនអាកាស និងនាវាចម្បាំង២គ្រឿងដើម្បីការពារដែនទឹក កងទ័ពអូស្ត្រាលីចំនួន១២០០នាក់ និងទាហានជើងទឹកហ្វីលីពីន៥៦០ ឡើងលើឆ្នេរ បង្កើតខ្សែត្រៀមចាំវាយសមុ្រកទៅលើសត្រូវ។
តាមដានមើលសមយុទ្ធយោធារួមគ្នាជាមួយអូស្រ្តាលី ប្រធានាធិបតីហ្វីលីពីន លោកហ្វ៊ែរឌីណង់ ម៉ាកូស ជូញ៉រ លើកឡើងពីសារៈសំខាន់នៃសមយុទ្ធយោធា ការពង្រឹងសហប្រតិបត្តិការយោធារវាងអូស្ត្រាលី និងហ្វីលីពីន នៅក្នុងបរិបទដែលតំបន់កំពុងរងអង្រួនដោយព្រឹត្តិការណ៍ជាច្រើននៅប៉ុន្មានឆ្នាំមកនេះ។ សម្រាប់រដ្ឋមន្រ្តីការពារជាតិអូស្ត្រាលី សមយុទ្ធយោធារួមជាមួយហ្វីលីពីនមានគោលដៅទាមទារឲ្យប្រទេសជាប់ជម្លោះក្នុងសមុទ្រចិនខាងត្បូងគោរពច្បាប់អន្តរជាតិ។
តុលាការអចិន្រ្តៃយ៍នៃអាជ្ញាកណ្តាលដែលមានទីស្នាក់ការក្នុងទីក្រុងឡាអេ ប្រទេសហូឡង់ធ្លាប់បានចេញសេចក្តីសម្រេចឲ្យហ្វីលីពីនឈ្នះចិននៅក្នុងជម្លោះដណ្តើមដែនទឹកនៅសមុទ្រចិនខាងត្បូង ប៉ុន្តែ តែចិនមិនទទួលស្គាល់ មិនគោរពតាម និងផ្គើនបញ្ជូនកប៉ាល់ល្បាត និងទូកនេសាទរាប់រយគ្រឿងទៅបោះយុថ្កានៅតំបន់ថ្មប៉ប្រះទឹក Scarborough។
តាមប្រមុខការពារជាតិអូស្ត្រាលី ប្រទេសទាំងពីរកំពុងពិភាក្សាគ្នាពីគម្រោងល្បាតរួមគ្នារបស់នាវាចម្បាំងអូស្ត្រាលី និងហ្វីលីពីននៅសមុទ្រចិនខាងត្បូង និងនៅកន្លែងដែលមានផលប្រយោជន៍រួមគ្នារបស់ហ្វីលីពីន និងអូស្ត្រាលី។
សមយុទ្ធយោធាហ្វីលីពីនជាមួយអូស្ត្រាលីកើតនៅ៣សប្តាហ៍ក្រោយដែលឆ្មាំសមុទ្រចិនធ្វើបាបបាញ់ទឹក រារាំងមិនឲ្យនាវាចម្បាំងហ្វីលីពីនដឹកនាំយកស្បៀងអាហារទៅផ្គត់ផ្គង់កងទ័ព ប្រចាំការនៅលើខ្មោចចម្បាំងដែលហ្វីលីពីនអូសយកទៅដាក់បញ្ឈរជាទីតាំងខ្សែព្រំដែនទឹករបស់ខ្លួន។ ទោះជាចិនទាមទារឲ្យហ្វីលីពីនអូសយកខ្មោចកប៉ាល់ចម្បាំងចេញពីតំបន់ទឹកដែលចិនចាត់ទុកជាកម្មសិទ្ធិរបស់ខ្លួន កងទ័ពហ្វីលីពីននៅតែព្យាយាមដឹកជញ្ជូនស្បៀងបានសម្រេចយកទៅចិញ្ចឹមទាហានប្រចាំការនៅលើខ្មោចកប៉ាល់ កាលពីថ្ងៃអង្គារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ