តុលាការហុងកុង បើកសវនាការកាត់ទោស លោកសេដ្ឋី ជីមី ឡៃ ចាងហ្វាងកាសែតប្រឆាំងដ៏ល្បីល្បាញ
នៅហុងកុង ថ្ងៃចន្ទ ទី១៨ធ្នូ តុលាការបើកសវនាការកាត់ទោស អ្នកជំនួញ លោក ជីមី ឡៃ ជាចាងហ្វាងកាសែតប្រឆាំងដ៏ល្បីល្បាញ។ លោកត្រូវនគរបាលចាប់ឃុំខ្លួនជាង ៣ ឆ្នាំមកហើយ ក្រោមបទចោទប្រកាន់«ឃុបឃិតជាមួយបរទេស»បំផ្លាញសន្តិសុខជាតិ។ ច្បាប់សន្តិសុខជាតិហុងកុង បានអនុម័តចេញក្នុងឆ្នាំ២០២០ ក្រោមអំណាចខ្សែញាក់របស់ចិន។ ក្រោមអំណាចច្បាប់សន្តិសុខជាតិនេះ គឺ ជនជាប់ចោទលោក ជីមី ឡៃ អាចនឹងត្រូវប្រឈមមុខជាប់ពន្ធនាគារអស់មួយជីវិត។ ភ្លាមៗនេះ រដ្ឋបាលសហរដ្ឋអាមេរិក និងអង់គ្លេស បានអំពាវនាវឲ្យដោះលែងលោក ជីមី ឡៃ ជាបន្ទាន់។ សហភាពអឺរ៉ុប ក៏ស្នើឲ្យទម្លាក់បទចោទប្រឆាំងរូបលោក។ ចំណែក អង្គការអ្នកកាសែតគ្មានព្រំដែន បានឲ្យដឹងថា គិតចាប់ពីដើមឆ្នាំនេះ មេដឹកនាំកាសែតជាង១០០ស្ថាប័ន បានចុះហត្ថលេខាលើញាតិអំពាវនាវឲ្យដោះលែងលោក ជីមី ឡៃ។
ចុះផ្សាយនៅថ្ងៃ៖
ស្តាប់ - ០២:២៩
សេដ្ឋីប្រាក់ពាន់លាន លោក ជីមី ឡៃ ជាម្ចាស់ក្រុមហ៊ុន Next Media ដែលក្នុងនោះ រួមមានកាសែតប្រឆាំង Apple Daily ដែរ។ កាសែតនេះ គាំទ្រយ៉ាងពេញទំហឹងចំពោះចលនាបាតុកម្មដើម្បីលិទ្ធិប្រជាធិបតេយ្យហុងកុង ដែលផ្ទុះខ្លាំងកាលពីឆ្នាំ២០១៩។
ថៅកែកាសែតប្រឆាំងរូបនេះ ត្រូវអាជ្ញាធរហុងកុង ចាប់ឃុំខ្លួនតាំងពីឆ្នាំ២០២១ ដោយចោទប្រកាន់អំពីបទរួមផ្សំគំនិតឃុបឃិតជាមួយបរទេសប្រឆាំងនឹងសន្តិសុខជាតិ ហើយនិងញុះញង់ឲ្យស្អប់ខ្ពើម ប្រឆាំងរដ្ឋអំណាច។ ឃុំឃាំងអស់ជាង ៣ ឆ្នាំ គឺ នេះជាលើកទី១ ដែលលោក ជីមី ឡៃ បានបង្ហាញខ្លួន។ អ្នកកាសែតបរទេសឈរជើងនៅហុងកុង កត់សម្គាល់ថា លោក ជីមី ឡៃ ទើបតែឈានដល់វ័យ៧៦ឆ្នាំ បានបង្ហាញមុខ ដោយស្នាមញញឹមស្ងប់ ហើយបើតាមកូនប្រុសរបស់លោក ជីមី ឡៃ គឺលោកទំនងជាមានសុខភាពល្អ តែស្រកទម្ងន់ច្រើន។
គួរជ្រាបថា មុនពេលចាប់ឃាត់ខ្លួន លោក ជីមី ឡៃ បានអញ្ជើញទៅរដ្ឋធានីវ៉ាស៊ីនតោន និងជួបជាមួយអនុប្រធានាធិបតីអាមេរិក លោក មៃឃ៍ ផែន្ស៍ នៅសេតវិមាន នាខែកក្កដា២០១៩។ កាលនោះ លោក ជីមី ឡៃ បានប្រកាសអំពាវនាវឲ្យសហគមអន្តរជាតិដាក់សម្ពាធទណ្ឌកម្មលើរដ្ឋបាលហុងកុង និងប្រទេសចិន។
មួយថ្ងៃ មុនសវនាការនេះ រដ្ឋបាលទីក្រុងវ៉ាស៊ីនតោន តាមរយៈអ្នកនាំពាក្យក្រសួងការបរទេសអាមេរិក លោក ម៉ាត់ធីវ មីល្ល័រ បានជំរុញរដ្ឋអំណាចក្រុងប៉េកាំង និងរដ្ឋអំណាចហុងកុង ឲ្យគោរពសិទ្ធិសេរីភាសារព័ត៌មាននៅហុងកុង ហើយត្រូវដោះលែងលោក ជីមី ឡៃ ព្រមទាំងអ្នកជាប់ឃុំផ្សេងទៀត។ បើតាមសេចក្តីថ្លែងការរបស់សហរដ្ឋអាមេរិក ពួកអ្នកជាប់ឃុំនៅហុងកុងនោះ គ្មានកំហុសឡើយ ពីព្រោះថា ពួកគេគ្រាន់តែអនុវត្តសិទ្ធិសេរីភាពរបស់ខ្លួនតែប៉ុណ្ណោះ។
ដូចសហរដ្ឋអាមេរិកដែរ រដ្ឋបាលទីក្រុងឡុងដ៍ បានអំពាវនាវឲ្យដោះលែងលោក ជីមី ឡៃ។ លោកសេដ្ឋី ជីមី ឡៃ ក៏មានសញ្ជាតិអង់គ្លេស។ កាលពីសប្តាហ៍មុន ថ្ងៃទី១២ធ្នូ កូនប្រុសរបស់លោក ជីមី ឡៃ ឈ្មោះ សេបាស្យាង ឡៃ បានចាកចេញពីហុងកុងទៅកាន់អង់គ្លេស។ ក្រុងឡុងដ៍ ជាទីដែលកូនប្រុសលោក ជីមី ឡៃ ជួបជាមួយនឹងរដ្ឋមន្ត្រីការអង់គ្លេស ដេវីដ ខាំមឺរ៉ុន ហើយប្រមុខទូតអង់គ្លេសរូបនេះ ថ្លែងថា ការចោទប្រកាន់ទោសទាំងឡាយប្រឆាំងនឹងសេរីភាពសារព័ត៌មាននៅហុងកុង គឺសុទ្ធតែជាមូលហេតុនយោបាយ។ បើតាមកូនប្រុសរបស់លោក ជីមី ឡៃ គឺ រដ្ឋមន្ត្រីការបរទេសអង់គ្លេស បានពិភាក្សាពីសប្តាហ៍មុន ជាមួយសមភាគីចិន លោក វ៉ាង យី អំពីសំណុំរឿងនេះ។
តែយ៉ាងណាក៏ដោយ នៅព្រឹកថ្ងៃច័ន្ទ ចំពេលបើកសវនាការនៅហុងកុង អ្នកនាំពាក្យក្រសួងការបរទេសចិន លោក វ៉ាង វិនប៊ិន ចាត់ទុកប្រតិកម្មរបស់សហរដ្ឋអាមេរិកនិងអង់គ្លេសចំពោះសំណុំរឿងនេះ ថាជាឧបាយកលល្បិច ហើយជាការបំពានលើនីតិរដ្ឋនិងរំលោភគោលការណ៍ច្បាប់អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ