ព្រះមហាក្សត្រអង់គ្លេស ឆាលស៍ទី៣ កើតជំងឺមហារីក
សាររបស់មេដឹកនាំក្នុងពិភពលោកសម្រាប់ព្រះមហាក្សត្រអង់គ្លេស គឺព្រះអង្គឆាលស៍ទី៣មានជាបន្តបន្ទាប់ នៅថ្ងៃអង្គារនេះ បន្ទាប់ពីព្រះរាជវាំងប្រកាសជាសាធារណៈថា ព្រះអង្គឆាលស៍ កើតមជំងឺមហារីក។ តាមព្រះរាជវាំង ព្រះមហាក្សត្រអង់គ្លេសចាប់ផ្តើមការព្យាបាលជំងឺមហារីក តាំងពីថ្ងៃចន្ទ ដែលជាហេតុធ្វើឲ្យព្រះអង្គត្រូវផ្អាកព្រះរាជកិច្ចទាំងអស់ ដោយលើកលែងការជួបពិភាក្សាកិច្ចការប្រទេសជាតិ ជាមួយនាយករដ្ឋមន្រ្តីអង់គ្លេស តែប៉ុណ្ណោះ។ ដំណឹងព្រះមហាក្សត្រ ឆាលស៍កើតជំងឺមហារីកជាដំណឹងរន្ធត់សម្រាប់ប្រជានុរាស្រ្តអង់គ្លេស រួមទាំងព្រះអង្គម្ចាស់ហារីផង ដែលជាបុត្រាទី២។ នៅថ្ងៃចន្ទម្សិលមិញ ព្រះអង្គម្ចាស់ហារីប្រាប់អ្នកកាសែតថា ព្រះអង្គនឹងយាងទៅមើលព្រះបិតានៅក្នុងសប្តាហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២០
ទើបឡើងគ្រងរាជសម្បត្តិបន្តពីព្រះមាតា ព្រះមហាក្សត្រី អេលីហ្សាបិតទី២ បាន១ឆ្នាំកន្លះ ព្រះមហាក្សត្រអង់គ្លេស ឆាលស៍ទី៣ ក្នុងព្រះជន្ម៧៥ព្រះវស្សា កើតជំងឺមហារីក។ ព្រះរាជវាំងអង់គ្លេសបានប្រកាសដំណឹងដ៏រន្ធត់ និងទុក្ខសោក នៅថ្ងៃអង្គារទី ៦កុម្ភៈនេះ ពោលគឺនៅបន្ទាប់ពីព្រះមហាក្សត្រឆាលស៍ទើបយាងចាកចេញពីមន្ទីរពេទ្យទីក្រុងឡុងដ៍ ជាទីដែលព្រះអង្គទទួលការព្យាបាលជំងឺប្រូស្តាត។
ព្រះរាជវាំងមិនបានលម្អិតពីប្រភេទជំងឺមហារីក ដែលក្រុមគ្រូពេទ្យរកឃើញ នៅក្នុងអំឡុងពេលព្រះអង្គទទួលការព្យាបាលជំងឺប្រូស្តាត នៅមន្ទីរពេទ្យ ប៉ុន្តែ គ្រាន់តែបញ្ជាក់ថា មិនមែនជាជំងឺមហារីកប្រូស្តាត។ តាមព្រះរាជវាំងដដែល តាំងពីថ្ងៃចន្ទ ព្រះមហាក្សត្រ ឆាលស៍ចាប់ផ្តើមការព្យាបាលជំងឺមហារីកដែលត្រូវការពេលវេលាវែង។ នៅក្នុងអំឡុងពេលនេះ ក្រុមគ្រូពេទ្យបានផ្តល់យោបល់ឲ្យព្រះអង្គត្រូវផ្អាករាល់ព្រះរាជកិច្ចនៅក្រៅព្រះរាជវាំង ដោយលើកលែងតែ កិច្ចការដែលទាក់ទងតួនាទីរបស់ព្រះអង្គក្នុងនាមជាប្រមុខរដ្ឋរបស់ប្រទេសចំនួន១៥ ដែលនៅក្នុងមាន រាជាណាចក្រអង់គ្លេស។
នៅក្រោយ ទទួលបានដំណឹងថា ព្រះបិតា កើតជំងឺមហារីក ព្រះអង្គម្ចាស់ហារី ដែលកំពុងរស់នៅរដ្ឋកាលីហ្វ័នីញ៉ា ជាមួយភរិយាជាតារាភាពយន្តអាមេរិក ប្រាប់អ្នកកាសែតថា ព្រះអង្គនឹងយាងទៅអង់គ្លេស នៅមើលព្រះបិតា នៅសប្តាហ៍នេះ។ ដំណឹងព្រះមហាក្សត្រឆាលស៍កើតជំងឺមហារីកបានបណ្តាលឲ្យមានប្រតិកម្មភ្លាមៗពីប្រជាជនអង់គ្លេស និងថ្នាក់ដឹកនាំបរទេស។
នៅថ្ងៃអង្គារនេះ នាយករដ្ឋមន្រ្តីអង់គ្លេស លោករីស៊ី ស៊ូណាក់ប្រាប់ទូរទស្សន៍BBC ថា អង់គ្លេសស្លុត និងព្រួយចិត្តដែលលឺដំណឹងនេះ ប៉ុន្តែ សម្រាប់លោក សំណាងល្អដែលគេឆាប់រកឃើញទាល់ពេលវេលា ជំងឺមហារីករបស់ព្រះមហាក្សត្រឆាលស៍ ដើម្បីឲ្យព្រះអង្គឆាប់ទទួលបានការព្យាបាល។ មេដឹកនាំប្រទេសធំៗដូចជា ប្រធានាធិបតីអាមេរិក នាយករដ្ឋមន្រ្តីឥណ្ឌា នាយករដ្ឋមន្រ្តីអូស្ត្រាលី និងប្រធានាធិបតីបារាំងបានផ្ញើសារជូនពរឲ្យព្រះមហាក្សត្រអង់គ្លេស ឆាសល៍ឆាប់ជាក្នុងពេលខាងមុខ។
ព្រះមហាក្សត្រឆាលស៍ទី៣ ទើបឡើងគ្រងរាជសម្បត្តិ បន្តពីព្រះមាតា ព្រះមហាក្សត្រីអេលីហ្សាបិត ទី២ ដែលសោយទីវង្គត នៅខែកញ្ញាឆ្នាំ ២០២២ ក្នុងព្រះជន្ម ៩៦ព្រះវស្សា។
ផ្ទុយពីព្រះរាជមាតាដែលមិនប្រកាសជំងឺរបស់ព្រះអង្គនៅមុនសោយទីវង្គត ព្រះមហាក្សត្រឆាលស៍ ទី ៣បើកចំហរពីស្ថានភាពព្រះរាជសុខភាពរបស់ព្រះអង្គ។ នៅខែមុននេះ គេបានអបអរព្រះអង្គដែលមានតម្លាភាព ប្រកាសឲ្យគេដឹងថា ព្រះអង្គត្រូវចូលព្យាបាលជំងឺប្រូស្តាត។ ក្រុមគ្រូពេទ្យអង់គ្លេសផ្ទាល់ កោតសរសើរសេចក្តីក្លាហានរបស់ព្រះអង្គខ្លាំងណាស់ ព្រោះថា ការនិយាយបើកចំហរឲ្យគេដឹងពីជំងឺប្រូស្តាត និងជំងឺមហារីករបស់ព្រះអង្គ ជាសារលើកទឹកចិត្តឲ្យគេចាប់អារម្មណ៍ពីជំងឺប្រូស្តាត និងជំងឺមហារីកជាទូទៅ។ តាមវិបសៃតិ៍សេវាសុខភាពសាធារណៈអង់គ្លេស មានជំងឺមហារីកប្រមាណ ២០០ប្រភេទ។ នៅអង់គ្លេស ប្រជាជនពាក់កណ្តាលធ្លាប់កើតមានជំងឺមហារីកម្តងក្នុងមួយជីវិតរបស់ពួកគេ។ ជំងឺមហារីកដែលកើតញឹកញាប់ជាងគេនៅអង់គ្លេស គឺមហារីកដោះ មហារីកប្រូស្តាត មហារីកសួត និងមហារីកពោះវៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ