រដ្ឋសភាឯកបក្សគ្រោងចាត់នីតិវិធីប្រឆាំងតំណាងរាស្ត្រ៥៥នាក់ដែលអវត្តមាន
រដ្ឋសភាអាណត្តិទី៥ដែលមានតែតំណាងរាស្ត្រគណបក្សប្រជាជនកម្ពុជាគ្រោងចាត់នីតិវិធីតាមផ្លូវច្បាប់ចំពោះតំណាងរាស្ត្រគណបក្សសង្គ្រោះជាតិ ៥៥ នាក់ដែលបានអវត្តមានមិនចូលប្រជុំសភារយៈពេល៣ខែមកហើយ។ នីតិវិធីដំបូងគឺការដាក់របាយការណ៍ស្តីពីបញ្ហានេះថ្វាយព្រះមហាក្សត្រ និងទៅក្រុមប្រឹក្សាធម្មនុញ្ញដើម្បីឲ្យស្ថាប័នកំពូលទាំងពីរសម្រេចវិធានការបន្តទៀត។ ក៏ប៉ុន្តែ បក្សកាន់អំណាចរង់ចាំមើលលទ្ធផលចរចាសិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
គណៈកម្មការអចិន្ដ្រៃយ៍រដ្ឋសភាគ្រោងនឹងធ្វើរបាយការណ៍ស្តីពីអវត្តមានតំណាងរាស្ត្រ ៥៥នាក់របស់គណបក្សសង្គ្រោះជាតិដើម្បីដាក់ថ្វាយព្រះមហាក្សត្រ គណៈកម្មាធិការជាតិរៀបចំការបោះឆ្នោតនិងក្រុមប្រឹក្សាធម្មនុញ្ញដើម្បីស្នើវិធានការតាមផ្លូវច្បាប់។ នេះបើយោងតាមលោក ងួន ញ៉ិល អនុប្រធានទី១រដ្ឋសភាដែលត្រូវបានគេហទំព័រគណបក្សប្រជាជនកម្ពុជាស្រង់សម្តីមកចុះផ្សាយកាលពីថ្ងៃទី៣១ធ្នូឆ្នាំ ២០១។
យ៉ាងណាក៏ដោយ លោក ជាម យៀប សមាជិកគណៈកម្មាធិការអចិន្ត្រៃយ៍រដ្ឋសភានិងជាមន្ត្រីជាន់ខ្ពស់គណបក្សប្រជាជនកម្ពុជាបានប្រាប់វិទ្យុបារាំងអន្តរជាតិបន្ថែមទៀតថា ចំណាត់ការនេះនៅមិនទាន់បានធ្វើនៅឡើយទេដោយសារតែគេត្រូវរង់ចាំមើលការវិវឌ្ឍស្ថានការណ៍នយោបាយចុងក្រោយសិន។ មន្ត្រីជាន់ខ្ពស់គណបក្សកាន់អំណាចរូបនេះអះអាងថា ចង់ឲ្យរដ្ឋសភាអនុម័តច្បាប់មួយឲ្យបានច្បាស់លាស់ដើម្បីចាត់ការតំណាងរាស្ត្រណាដែលមិនចូលបំពេញការងារ។
គួរម្លឹកថា លទ្ធផលនៃការបោះឆ្នោតសភាអាតណត្តិទី៥ដែលបានធ្វើឡើងកាលពីថ្ងៃទី២៨ កក្កដា ឆ្នាំ ២០១៣ បានបង្ហាញថា គណបក្សប្រជាជនកម្ពុជាទទួលបាន ៦៨ កៅអី និងគណបក្សសង្គ្រោះជាតិទទួលបាន៥៥ កៅអីក្នុងចំណោម១២៣ កៅអីក្នុងរដ្ឋសភា។រដ្ឋសភាឯកបក្សដែលមានតែតំណាងរាស្ត្រគណបក្សប្រជាជនកម្ពុជាបានចាប់កំណើតជាផ្លូវការកាលពីថ្ងៃទី ២៣ ខែកញ្ញាបន្ទាប់ពីការកោះប្រជុំលើកដំបូងក្រោមព្រះរាជាធិបតីភាពរបស់ព្រះមហាក្សត្រ។
ចំណែកឯ តំណាងរាស្ត្រជាប់ឆ្នោតគណបក្សសង្គ្រោះជាតិទាំងអស់បានធ្វើពហិការមិនចូលសភាតាំងពីពេលនោះមកក្រោមហេតុផលថាការបោះឆ្នោតមានភាពមិនប្រក្រតីជាច្រើនដែលគណបក្សនេះមិនអាចទទួលយកបាន។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានអះអាងថា ក្រុមប្រឹក្សាធម្មនុញ្ញស្ថិតនៅក្រោមការគ្រប់គ្រងរបស់គណបក្សប្រជាជនកម្ពុជា ដូច្នេះ ការសម្រេចរបស់ស្ថាប័ននេះគ្មានយុត្តិធម៌ទេ។ គណបក្សសង្គ្រោះជាតិនឹងមិនទទួលយកការសម្រេចរបស់ស្ថាប័ននេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ