ឯកអគ្គរាជទូតកម្ពុជានៅ អ.ស.ប៖ សវនាការកាត់ទោសលោក កឹម សុខា កំពុងប្រព្រឹត្តទៅដោយរលូននិងមានតម្លាភាព
ឯកអគ្គរាជទូតកម្ពុជាប្រចាំនៅអង្គការសហប្រជាជាតិ បានប្រាប់ទៅគណៈប្រតិភូសហភាពអឺរ៉ុបថា ដំណើរការកាត់ទោសអតីតប្រធានគណបក្សប្រឆាំងលោក កឹម សុខា កំពុងប្រព្រឹត្តទៅដោយរលូននិងមានតម្លាភាព។ ជាងនេះទៅទៀត ការចោទប្រកាន់របស់គណៈប្រតិភូសហភាពអឺរ៉ុប នៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៣ មិនបានបរិយាយត្រឹមត្រូវពីកម្ពុជាសោះឡើយ។
ចុះផ្សាយនៅថ្ងៃ៖
ស្តាប់ - ០២:៣១
ឯកអគ្គរាជទូតកម្ពុជាប្រចាំនៅអង្គការសហប្រជាជាតិ លោក អាន សុខខឿន បានប្រាប់ទៅគណៈប្រតិភូសហភាពអឺរ៉ុបនៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិកាលពីថ្ងៃទី ២៨ កុម្ភៈ ថា ដំណើរការកាត់ទោសអតីតប្រធានគណបក្សប្រឆាំងលោក កឹម សុខា កំពុងប្រព្រឹត្តទៅដោយរលូន និងមានតម្លាភាព។ ប៉ុន្តែអ្នកឃ្លាំមើលសវនាការមកពីអង្គការសង្គមស៊ីវិល លោក សាំង សែនករុណា មិនបង្ហាញការភ្ញាក់ផ្អើល ចំពោះសេចក្តីថ្លែងការណ៍របស់តំណាងកម្ពុជានៅអង្គការសហប្រជាជាតិនេះឡើយ។
ការចេញមកបញ្ជាក់របស់ឯកអគ្គរាជទូតកម្ពុជាប្រចាំនៅអង្គការសហប្រជាជាតិយ៉ាងដូច្នេះ គឺជាការឆ្លើយតបទៅនឹងរបាយការណ៍របស់គណៈប្រតិភូសហភាពអឺរ៉ុបតំណាងដោយប្រទេសអូស្ត្រាលី និងបារាំង នៅក្នុងកិច្ចប្រជុំលើកទី៤៣នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងសឺណែវប្រទេសស្វីស កាលពីថ្ងៃទី ២៨ កុម្ភៈ។ គណៈប្រតិភូសហភាពអឺរ៉ុបតំណាងដោយប្រទេសអូស្ត្រាលី និងបារាំង ដែលបានអំពាវនាវជាថ្មីម្តងទៀត ឲ្យអាជ្ញាធររដ្ឋាភិបាលកម្ពុជា ស្តាលទ្ធិប្រជាធិបតេយ្យ និងបើកលំហសេរីភាពនយោបាយ អង្គការសង្គមស៊ីវិល សេរីភាពសារព័ត៌មាន ព្រមទាំងដោះលែងសកម្មជនអតីតគណបក្សប្រឆាំងទាំងអស់អោយមានសេរីភាពឡើងវិញ។ ក៏ប៉ុន្តែឯកអគ្គរាជទូតកម្ពុជាប្រចាំនៅអង្គការសហប្រជាជាតិ លោក អាន សុខខឿន បានប្រើប្រាស់សិទ្ធិក្នុងការឆ្លើយតបរបស់កម្ពុជាថា របាយការណ៍ដែលលើកឡើងដោយគណៈប្រតិភូសហភាពអឺរ៉ុបតំណាងដោយប្រទេសអូស្ត្រាលី និងបារាំងនេះ គឺមិនបានបរិយាយត្រឹមត្រូវពីស្ថានភាពកម្ពុជា តាមរយៈសេចក្តីថ្លែងការណ៍លម្អៀង ជារបាយការណ៍ដែលលើកឡើងតែមួយជ្រុង និងជារបាយការណ៍ដែលធ្វើឡើងក្រោមហេតុផលនយោបាយ និងស្តង់ដារពីរ។ នៅកម្ពុជា គ្រប់គណបក្សនយោបាយ អង្គការសង្គមស៊ីវិល និងប្រព័ន្ធផ្សព្វផ្សាយទាំងអស់ ដែលគោរពច្បាប់ អាចធ្វើប្រតិបត្តិការដោយសេរី លើកលែងតែស្ថាប័នប្រព្រឹត្តខុសច្បាប់ទេ ដែលត្រូវបានហាមឃាត់។ នេះគឺជាការឆ្លើយតបរបស់ឯកអគ្គរាជទូតកម្ពុជាប្រចាំនៅអង្គការសហប្រជាជាតិ លោក អាន សុខខឿន។
យ៉ាងណាក៏ដោយ សម្រាប់លោក សាំង សែនករុណា អ្នកនាំពាក្យសមាគមការពារសិទ្ធិមនុស្សអាដហុក លោកមិនភ្ញាក់ផ្អើលឡើយ ចំពោះសេចក្តីថ្លែងការណ៍របស់ឯកអគ្គរាជទូតកម្ពុជាប្រចាំនៅអង្គការសហប្រជាជាតិនេះ។ ប៉ុន្តែអ្វីជាការចោទសួរ ថាតើសវនាការនេះ នឹងមានការជឿទុកចិត្តកម្រិតណាសម្រាប់សាធារណជនជាតិ និងអន្តរជាតិ។ ចំណែកលោក ផែន ហេង មេធាវីការពារក្តីលោក កឹម សុខា បានកត់សំគាល់ដែរថា សវនាការកាត់ទោសលោក កឹម សុខា រយៈពេលកន្លងមកនេះ គឺពោពេញដោយវិមតិសង្ស័យ។ នៅក្នុងសវនាការកាត់ទោសចុងក្រោយនៅក្នុងសប្តាហ៍នេះ លោកនិងក្រុមមេធាវីលោក កឹម សុខា បានស្នើសុំជាថ្មីម្តងទៀត ឲ្យតុលាការទម្លាក់ចោលការចោទប្រកាន់លើលោក កឹម សុខា តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ