មេធាវីលោក កឹម សុខា៖ សវនាការថ្ងៃស្អែក នឹងបន្តជជែកវែកញែកពីមូលហេតុបង្កើតអតីតបក្សសង្រ្គោះជាតិ
ថ្ងៃពុធ ទី២៦ ខែកុម្ភៈស្អែកនេះ តុលាការក្រុងភ្នំពេញ នឹងបន្តសវនាការលើសំណុំរឿងសន្ទិដ្ឋិភាពជាមួយបរទេសរបស់លោកកឹម សុខា ប្រធានអតីតគណបក្សសង្រ្គោះជាតិ បន្ទាប់ពីបានខកខានបើកសវនាការកាលពីសប្តាហ៍មុន។ មេធាវីលោកកឹម សុខា បានអះអាងប្រាប់វិទ្យុបារាំងអន្តរជាតិនៅព្រឹកថ្ងៃអង្គារនេះថា សវនាការនៅថ្ងៃស្អែក និងខានស្អែកនេះ នឹងបន្តសួរនាំ និងជជែកវែកញែកពីបុព្វហេតុដែលលោកកឹម សុខា ចូលរួមបង្កើតគណបក្សសង្រ្គោះជាតិ។
ចុះផ្សាយនៅថ្ងៃ៖
ស្តាប់ - ០២:១៧
សហមេធាវីរបស់លោកកឹម សុខា គឺលោកផែង ហេង បានគូសបញ្ជាក់ឱ្យដឹងថា សវនាការចុងក្រោយបង្អស់របស់លោកកឹម សុខា គឺបានជជែកវែកញែកគ្នាសើៗ មិនបានស៊ីជម្រៅឡើយពីមូលហេតុដែលលោកកឹម សុខា ចូលរួមបង្កើតគណបក្សសង្រ្គោះជាតិជាមួយលោកសម រង្ស៊ី។ ហេតុដូច្នេះហើយ លោកថា នៅសប្តាហ៍នេះ សវនាការលើសំណុំរឿងលោកកឹម សុខា នឹងបន្តជជែកវែកញែកគ្នាស៊ីជម្រៅលើបញ្ហានេះមុនឈានទៅបញ្ហាផ្សេងទៀត។ បើតាមលោកមេធាវីផែង ហេង សវនាការនឹងជជែកខ្លាំងពីគោលបំណង និងរបៀបនៃការរៀបចំបង្កើតគណបក្សសង្រ្គោះជាតិ។ គណបក្សសង្រ្គោះជាតិដែលត្រូវបានតុលាការកំពូលកម្ពុជារំលាយចោលកាលពីឆ្នាំ២០១៧ដោយចោទថា បានរៀបចំផែនការធ្វើបដិវត្តពណ៌ចង់ផ្តួលរំលំរដ្ឋាភិបាលកម្ពុជា។
សូមជម្រាបជូនថា កាលពីសវនាការនាថ្ងៃទី១២ និង ១៣ ខែកុម្ភៈកន្លងទៅ មានភាពតានតឹនគ្នាខ្លាំងរវាងក្រុមមេធាវីលោកកឹម សុខា ជាមួយនឹងប្រធានអង្គជំនុំជម្រះ និងតំណាងអយ្យការ។ ភាពតានតឹងនេះ គឺដោយសារចៅក្រមមិនអនុញ្ញាតឱ្យក្រុមមេធាវីបានឡើងនិយាយច្រើននៅក្នុងតុលាការ។ នេះបើតាមលោកគូសបញ្ជាក់របស់លោកមេធាវីផែង ហេង។ ដោយសារតែបែបនេះហើយ ទើបក្រុមមេធាវីបានសម្រេចដើរចេញពី សវនាការតែម្តង។ លោកមេធាវីផែង ហេង បានអះអាងថា ការដើរចេញនេះ គឺប្រសើរជាងអង្គុយធ្វើជាមនុស្សគរនៅក្នុងសវនាការ។ ចៅក្រមមិនពេញចិត្តនឹងសកម្មភាពរបស់ក្រុមមេធាវីលោកកឹម សុខានេះទេ ហើយថែមទាំងសួរលោកកឹម សុខា ចង់ប្តូរមេធាវីទាំងនេះចេញថែមទៀតផង។
ប៉ុន្តែ លោកកឹម សុខា នៅតែរក្សាក្រុមមេធាវីរបស់លោកដូចដើម។ លោកមេធាវីផែង ហេង បានលើកឡើងថា នៅថ្ងៃស្អែកនេះ ក្រុមមេធាវីលោកកឹម សុខា នឹងចូលរួមសវនាការ ដើម្បីការពារក្តីជូនលោកកឹម សុខា ដូចធម្មតាមិនមានអ្វីប្រែប្រួលនោះឡើយ។ កាលពីថ្ងៃចន្ទ លោកនាយករដ្ឋមន្រ្តីហ៊ុន សែន បានបញ្ចេញប្រតិកម្មទៅកាន់សហភាពអឺរ៉ុបដោយភ្ជាប់ជាមួយករណីលោកកឹម សុខា។ ដោយមិនចុចឱ្យចំឈ្មោះ លោកនាយករដ្ឋមន្រ្តី បានគូសបញ្ជាក់ថា លោកមិនយកការដោះលែងទៅដោះដូរនឹងការអនុគ្រោះពន្ធពីសហភាពអឺរ៉ុបមកវិញនោះទេ។ សម្រាប់លោកនាយករដ្ឋមន្រ្តី អ្នកប្រព្រឹត្តខុសច្បាប់ត្រូវតែទទួលខុសត្រូវចំពោះមុខច្បាប់ ហើយថា ច្បាប់ គឺច្បាប់ កាត់ទោសរួចហើយ គឺត្រូវយកទៅដាក់ពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ