ការចរចាគណបក្សប្រជាជន និងបក្សសង្គ្រោះជាតិ ចាប់ផ្តើមថ្ងៃទី៣ មករា
ទីបំផុតទៅក្រុមកម្រិតបច្ចេកទេសចរចានៃគណបក្សប្រជាជនកម្ពុជា និងគណបក្សសង្គ្រោះជាតិ បានលេចជារូបរាងម្តងទៀតហើយ។ ក្រុមបច្ចេកទេសដែលមានភាគីម្ខាងបីនេះ នឹងជួបចរចាជាមួយគ្នានៅថ្ងៃទី៣ នៅឯវិមានព្រឹទ្ធសភា។ ប៉ុន្តែ បក្សទាំងពីរនៅតែមានគោលជំហរមិនទាន់ស្របគ្នាទាំងស្រុងនៅឡើយទេ។ យ៉ាងណាក៏ដោយ អ្នកតាមដានបញ្ហាសង្គម បានអះអាងថា ជំនួបនៃការចរចានេះ គឺជាការអបអរសាទរបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
គណបក្សដែលកំពុងមានជម្លោះទាំងពីរនៅកម្ពុជា បានសម្រេចឱ្យមានក្រុមចរចាបច្ចេកទេសសារជាថ្មីម្តងទៀតហើយ បន្ទាប់ពីការបរាជ័យជាច្រើនលើក។ ក្រុមបច្ចេកទេសនេះ នឹងមានសមាសភាពម្ខាងបីនាក់ ហើយនឹងជួបគ្នានៅម៉ោង ៩ព្រឹក ថ្ងៃទី៣ មករា ឆ្នាំ២០១៤នៅវិមានព្រឹទ្ធសភា។ នេះបើតាមការបញ្ជាក់ពីមន្ត្រីគណបក្សទាំងពីរ គឺ លោក ព្រុំសុខា និង លោក យឹម សុវណ្ណដែលបានប្រាប់វិទ្យុបារាំងអន្តរជាតិនៅថ្ងៃពុធនេះ។
ជំនួបសារជាថ្មីនេះ គឺជាជំនួបបង្ហាញពីរបៀបវារៈ បើកផ្លូវមុនកិច្ចចរចាថ្នាក់កំពូលរវាងមេដឹកនាំគណបក្សនយោបាយទាំងពីរ។ ពោលគឺការចរចារវាង លោកនាយករដ្ឋមន្ត្រី ហ៊ុន សែន និងលោក សម រង្ស៊ី។ លោក ព្រុំ សុខា ដែលជាប្រធានក្រុមចរចាខាងគណបក្សប្រជាជនកម្ពុជា បានអះអាងថា គណបក្សកាន់អំណាចបានកំណត់គោលជំហរមួយគឺកំណែទម្រង់នៃប្រព័ន្ធបោះឆ្នោត។
លោក អះអាងថា គណបក្សប្រជាជនកម្ពុជា នឹងជំនៈរាល់ឧបសគ្គទាំងអស់ដើម្បីស្វែងរកដំណោះស្រាយចំពោះបញ្ហានយោបាយនាពេលបច្ចុប្បន្ន ដោយឈរលើគោលការណ៍គោរពឆន្ទៈរបស់ប្រជាពលរដ្ឋ។ ដោយឡែកគណបក្សសង្គ្រោះជាតិ មានរបៀបវារៈចំនួនពីរ គឺកំណែទម្រង់ប្រព័ន្ធបោះឆ្នោត និង ការបោះឆ្នោតឡើងវិញ។ នេះបើតាមលោក យឹម សុវណ្ណ។ អ្នកនាំពាក្យរូបនេះ បានអះអាងថា របៀបវារៈរបស់គណបក្សប្រឆាំងគឺជាឆន្ទៈរបស់ពលរដ្ឋម្ចាស់ឆ្នោតដែលបានចូលរួមបាតុកម្មជាមួយនឹងគណបក្សសង្គ្រោះជាតិនាពេលកន្លងមក។
គណបក្សប្រជាជនកម្ពុជានឹងបញ្ជូនសមាសក្រុមចរចារចំនួនបីរូបគឺ លោក ព្រុំ សុខា រដ្ឋលេខាធិការក្រសួងមហាផ្ទៃ លោក សក់ ស៊ីថា រដ្ឋលេខាធិការក្រសួងមហាផ្ទៃ និង លោក កើត រិទ្ធ រដ្ឋលេខាធិការក្រសួងយុត្តិធម៌។ដោយឡែកភាគី ខាងគណបក្សសង្គ្រោះជាតិ មានបីរូបដែរ គឺ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ លោកប៉ុល ហំម ប្រធាន គណៈកម្មាធិការនាយក និងលោកគួយ ប៊ុនរឿន អគ្គនាយករងរដ្ឋបាល។
ជំនួបចរចាសាជាថ្មីនេះ គឺកើតឡើងនៅចំពេលប្រទេសកម្ពុជាបានជួបប្រទះមហាបាតុកម្មជារៀងរាល់ថ្ងៃរបស់គណបក្សប្រឆាំង ដែលធ្វើពហិកាមិនព្រមចូលរួមប្រជុំក្នុងរដ្ឋសភា និងទាត់ចោលលទ្ធផលនៃការបោះឆ្នោតអាណត្តិទី៥កន្លងទៅនេះ។
អ្នកវិភាគឯករាជ្យ អ្នកស្រី ជា វណ្ណាត បានសម្តែងការអបអរចំពោះការព្រមព្រៀងឱ្យមានការចរចាសាជាថ្មីនេះ។ យ៉ាងណាក៏ដោយអ្នកវិភាគសង្គមរូបនេះ បានស្នើឱ្យគណបក្សទាំងពីរកុំប្រកាន់របៀបវារៈរឹងត្អឹងដាក់គ្នា ដោយគិតប្រយោជន៍ជាតិជាធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ