ហុងកុង៖ ក្រុមគ្រួសារអ្នកនយោបាយប្រឆាំង ត្រូវនគរបាលនាំខ្លួនទៅសាកសួរនៅប៉ុស្តិ៍នគរបាល
ថ្ងៃព្រហស្បតិ៍ ទី២០កក្កដា នគរបាលសន្តិសុខហុងកុង បាននាំខ្លួនមនុស្ស ៤ នាក់ ដែលជាសាច់សារខ្សែលោហិតនឹងអ្នកនយោបាយប្រឆាំង យកទៅសាកសួរចម្លើយនៅស្នងការនគរបាល។ ប្រភពពីប៉ូលិសហុងកុង គឺពួកគេទាំង ៤ នាក់ ជាប់ពាក់ព័ន្ធករណីឃុបឃិតនិងជួយជ្រោមជ្រែងឲ្យ«អ្នកទោស»រត់គេចខ្លួន។ «អ្នកទោស»ទីនេះ គ្មាននរណាផ្សេង ក្រៅពីសកម្មជននិងអ្នកនយោបាយ ៨ នាក់ ដែលប្រឆាំងយ៉ាងលេចធ្លោនឹងរដ្ឋអំណាចហុងកុង និងដែលបានទទួលសិទ្ធិជ្រកកោននយោបាយរស់នៅក្រៅប្រទេស។
ចុះផ្សាយនៅថ្ងៃ៖
ស្តាប់ - ០២:១៨
ប្រភពពីប៉ូលិសហុងកុង នគរបាលបាននាំខ្លួន ប្រុស២នាក់ ស្រី២នាក់ ទៅសាកសួរចម្លើយ និងថា នីតិវិធីស៊ើបសួរនៅតែបន្តមានជាហូរហែ ហើយការចាប់ខ្លួន និងឃុំខ្លួន ក៏មានជាបន្តបន្ទាប់ទៀត។
គួរជ្រាបថា ក្នុងចំណោមពួកគេទាំង ៤ នាក់នោះ គឺបុរសម្នាក់ ជាបងប្រុស របស់អ្នកតំណាងរាស្ត្រ Dennis Kwokដែលកំពុងភៀសខ្លួនស្នាក់នៅសហរដ្ឋអាមេរិក។ អតីតអ្នកតំណាងរូបនេះ ជាអ្នកនយោបាយម្នាក់ ក្នុងចំណោម ៨ នាក់ ដែលគាំទ្រចលនាប្រជាធិបតេយ្យ និងដែលត្រូវរដ្ឋអំណាចហុងកុង ដេញតាមព្យាបាទ រហូតត្រូវបង្ខំចិត្តរត់គេចខ្លួនចោលស្រុក។ ចំណែក ៣ នាក់ទៀត គឺម្នាក់ជាប្អូន ប្អូនថ្លៃ និងក្មួយប្រុស របស់អ្នកសហជីពដ៏លេចធ្លោឈ្មោះ Mung Siu-tat ដែលកំពុងតែរត់ភៀសខ្លួនដែរ។
ការស៊ើបសួរពីសំណាក់នគរបាលហុងកុងលើកនេះ គឺតែ ២ សប្តាហ៍ក្រោយ ដែលរដ្ឋបាលហុងកុង បានចេញសេចក្តីប្រកាសផ្តល់រង្វាន់លើកទឹកចិត្ត ចំនួន ១ លានដុល្លារហុងកុង ចំពោះបុគ្គលណាដែលផ្តល់ព័ត៌មានឈានទៅចាប់ខ្លួន អ្នកនយោបាយនិងសកម្មជនប្រឆាំង ទាំង ៨ នាក់។ បុគ្គលទាំង ៨ នាក់នេះ សព្វថ្ងៃ កំពុងតែជ្រកកោន«សិទ្ធិនយោបាយ»នៅសហរដ្ឋអាមេរិក អូស្ត្រាលី និង អង់គ្លេស។
ការប្រកាសដំណឹង អំពីការនាំខ្លួនក្រុមគ្រួសារសាច់ញាតិអ្នកនយោបាយប្រឆាំងរត់គេចខ្លួន យកទៅស៊ើបសួរនៅគ្រានេះ ក៏ធ្លាយចេញ បន្ទាប់ពី រដ្ឋបាលទីក្រុងប៉េកាំង បានចាត់តាំងលោក Dong Jingwei អនុរដ្ឋមន្ត្រីក្រសួងសន្តិសុខជាតិចិន ឲ្យមកត្រួតត្រាសន្តិសុខនៅរដ្ឋបាលហុងកុង។ លោក Dong Jingwei ជាមន្ត្រីចារកិច្ចចិន និងធ្លាប់ជាអ្នកត្រួតមើលការខុសត្រូវខាងសន្តិសុខ កាលពីព្រឹត្តិការណ៍បាតុកម្មហុងកុង ឆ្នាំ២០១៩។ ការចាត់តាំងរូបលោក ឲ្យមកត្រួតការសន្តិសុខហុងកុង កាលពីថ្ងៃអង្គារ គឺស្តែងឲ្យកាន់តែស៊ីជម្រៅ អំពីការរឹងបន្តឹងរបស់អំណាចមជ្ឈិមចិនប៉េកាំងទៅលើរដ្ឋបាលហុងកុង។
ហុងកុង ជាអតីតដែនអាណានិគមកិច្ចអង់គ្លេស និងត្រូវរដ្ឋអំណាចចិន អនុម័តច្បាប់គ្រប់គ្រងសន្តិសុខជាតិ នៅឆ្នាំ២០២០ បន្ទាប់ពី ចិនបានបង្ក្រាបចលនាបាតកម្មដ៏ធំសម្បើម អូសបន្លាយជាច្រើនខែ ក្នុងឆ្នាំ២០១៩។ ច្បាប់របស់ចិនដែលដាក់នៅហុងកុងនេះ បានចែងកំហិតទោសពន្ធនាគារអស់១ជីវិត ចំពោះបុគ្គលណាដែលធ្វើសកម្មភាពបង្កគ្រោះថ្នាក់ដល់សន្តិសុខជាតិហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ