រាជវាំងអង់គ្លេសអំណរគុណសារគាំទ្រដ៏កក់ក្តៅចំពោះអ្នកម្នាងខេត ដែលប្រកាសមានជំងឺមហារីក
ព្រះអង្គម្ចាស់ព្រះរាជបុត្រាស្នងរាជ្យ វិល្លៀម និងអ្នកម្នាង ខេត រំជួលព្រះរាជហឫទ័យជាខ្លាំង ចំពោះសារគាំទ្ររបស់ប្រជានុរាស្ត្រអង់គ្លេស និងអ្នកស្រឡាញ់គាំទ្រពីគ្រប់ជ្រុងជ្រោយនៃពិភពលោក។ សារគាំទ្រទាំងនោះ ធ្លាក់មកជាបន្តបន្ទាប់ ក្រោយពីព្រះនាង ខេត ចេញព្រះភក្ត្រប្រកាសពីការព្យាបាលជំងឺមហារីក។
ចុះផ្សាយនៅថ្ងៃ៖
ស្តាប់ - ០៣:១២
ព្រះរាជបុត្រស្នងរាជ្យ វិល្លៀម និងអ្នកម្នាង ខេត ក្សត្រទាំងទ្វេរំភើបរំជួលព្រះរាជហឫទ័យជាពន់ពេក ចំពោះបណ្តាសារថ្លែងគាំទ្រនិងលើកទឹកចិត្តដ៏កក្តៅ ពីសំណាក់ប្រជារាស្ត្រអង់គ្លេស ពីក្រុមប្រទេសសមាជិក ខុមមុនវែលត៍ ហើយសារពីក្រុមអ្នកនយោបាយ ពីតារាល្បីៗ និងពីអ្នកគាំទ្ររាជានិយមអង់គ្លេស នៅគ្រប់ទិសទីនៃពិភពលោក។ សារសម្តែងសមានចិត្តទាំងនោះធ្លាក់មក បន្ទាប់ពី ព្រះនាង ខេត ដ៏មានប្រជាប្រិយភាពជាងគេនៅក្នុងរាជវង្សអង់គ្លេស បានប្រកាសកាលពីថ្ងៃសុក្រ ថា អ្នកម្នាងទ្រង់ទើបតែយាងចេញពីការព្យាបាលជំងឺមហារីក នោះគឺការព្យាបាលកិច្ចការពារដោយប្រើថ្នាំគីមី ។
ការសព្វព្រះទ័យចេញព្រះភក្ត្រមានបន្ទូលជាវីដេអូនេះ បានបំបែកភាពស្ងប់ស្ងាត់ និងពាក្យចចាមអារាមជាច្រើនសប្តាហ៍មកនេះ។ ក្នុងសារវីដេអូ អ្នកម្នាង វ័យ៤២វស្សា រំឭកថា បានទទួលការព្យាបាល នៅខែមករា ហើយនិងទ្រង់សូមអរគុណចំពោះក្រុមគ្រូពេទ្យដែលយកចិត្តទុកដាក់ទីបំផុត។ ដោយមិនបញ្ជាក់ថាជំងឺមហារីកអ្វីនៅកន្លែងណា, ព្រះនាង ខេត គ្រាន់តែមានបន្ទូលឲ្យដឹងថា ការតស៊ូទប់ទល់នឹងជំងឺដ៏កាចសាហាវនិងការព្យាបាលដ៏ឈឺចាប់ ជារឿងលំបាកមួយ តែការលំបាកដ៏ធ្ងន់មួយទៀតរបស់អ្នកម្នាង គឺការពន្យល់ដល់បុត្រាបុត្រី ៣ ព្រះអង្គ ដែលតែនៅមានវ័យក្មេងៗតូចៗនៅឡើយ។ ទោះយ៉ាងនេះក្តី អ្នកម្នាងទ្រង់ប្តេជ្ញាតាំងស្មារតី រក្សាជំហររឹងមាំ។ រឹងមាំមួយផ្នែក ក៏ដោយបានព្រះស្វាមីគង់ក្បែរទ្រង់ជានិច្ច ក្នុងស្ថានភាពដ៏លំបាកនេះ។ ការសំខាន់១ទៀត អ្នកម្នាង ខេត បានឆ្លៀតឱកាសលើកទឹកចិត្តដល់អ្នកជំងឺមហារីកទាំងអស់ កុំឲ្យអស់សង្ឃឹម បាក់ទឹកចិត្តឲ្យសោះ ព្រោះអ្នកមិនឯកាឡើយ។
ចេញផ្សាយថ្ងៃអាទិត្យ កាសែត The Sunday Time បានកត់សម្គាល់ថា ខ្លឹមសារក្នុងវីដេអូនេះ សរសេរដោយហត្ថារបស់ទ្រង់ផ្ទាល់ និងបង្កប់មនោមសញ្ចេតនាមនុស្សធម៌ជាទីបំផុត។ ទន្ទឹមនោះ កាសែតប្រចាំថ្ងៃអង់គ្លេស The Mail on Sunday ក៏បានចាត់ទុក អ្នកម្នាង ខេត ថាជា ក្សត្រីដ៏ក្លាហាន។ ស្រដៀងគ្នានេះដែរ ព្រះរាជប្រកាសពីយប់ថ្ងៃសៅរ៍របស់រាជវាំងអង់គ្លេស បានឲ្យដឹងថា ព្រះមហាក្សត្រ ក៏បានសព្វព្រះទ័យកោតសរសើរជាខ្លាំងចំពោះសេចក្តីក្លាហានរបស់ព្រះនាង ខេត ដែលហ៊ានចេញព្រះភក្ត្រ ថ្លែងទុក្ខព្រួយ ហើយនិង រៀបរាប់ការតស៊ូទប់ទល់នឹងព្រះរោគា។ ព្រះមហាក្សត្រ សព្វព្រះរាជហឫទ័យចាត់ទុកថា នេះមានសេចក្តីក្លាហានគួរជាមោទនៈ។ ព្រះរាជវាំងអង់គ្លេស បានបញ្ជាក់ឲ្យដឹងទៀតថា នាប៉ុន្មានសប្តាហ៍ចុងក្រោយនេះ ព្រះមហាក្សត្រអង់គ្លេសព្រះអង្គ ឆាលស៍ ទី៣ ទ្រង់ទាក់ទងយ៉ាងជាប់លាប់បំផុត ជាមួយនឹងព្រះរាជសុណិសា (កូនប្រសាស្រី) ដ៏គួរឲ្យស្រឡាញ់របស់ទ្រង់។
គួររំឭកថា ព្រះរាជវង្សអង់គ្លេស ទទួលរងជំងឺមហារីកផ្ទួនៗគ្នា។ សូម្បីព្រះរាជា ព្រះអង្គ ឆាលស៍ ទី៣ ក៏កំពុងតែទទួលការព្យាបាលជំងឺមហារីកប្រូស្តាត ហើយនាពេលនេះ ព្រះនាង ខេត ថែម១អង្គទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ