បក្សប្រជាជននិងបក្សសង្គ្រោះជាតិ ទម្លាក់កំហុសដាក់គ្នារឿងអំពើហិង្សា
ក្រោយការផ្ទុះឡើងអំពើហិង្សាដែលឈានដល់មនុស្សរបួស និងចាប់ខ្លួននោះ ភ្លាមគណបក្សជាប់ឆ្នោតទាំងពីរចោទប្រកាន់គ្នាទៅវិញទៅមក ឱ្យទទួលខុសត្រូវចំពោះអំពើហិង្សានេះ។ បក្សកាន់អំណាចចោទបក្សប្រឆាំងថា ជាអ្នកនៅពីក្រោយអំពើហិង្សានេះ។ ប៉ុន្តែគណបក្សប្រឆាំង បានចោទបក្សកាន់អំណាចប្រើប្រាស់អំពើហិង្សាដែលជាដើមចមនៃការផ្អាកការចរចារវាងបក្សទាំងពីរ។ បក្សប្រឆាំងបានប្រកាសធ្វើមហាបាតុកម្មទ្រង់ទ្រាយធំចាប់ពីចុងសប្តាហ៍នេះទៅ ដើម្បីទាមទារឱ្យមានការដោះលែង និងបញ្ឈប់ប្រើប្រាស់អំពើហិង្សាដល់ក្រុមកម្មកររោងចក្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ភ្លាមៗក្រោយការផ្ទុះបាតុកម្មហិង្សាបង្ហូរឈាមរវាងកងកម្លាំងរបស់រដ្ឋាភិបាល និងក្រុមកម្មករ គណបក្សកាន់អំណាច និងបក្សប្រឆាំងទម្លាក់កំហុសដាក់គ្នារឿងអំពើហិង្សានេះ។ គណបក្សប្រជាជនកម្ពុជាបានចោទថា បក្សសង្គ្រោះជាតិថា ជាអ្នកនៅពីក្រោយការអុជអាលញុះញង់ឱ្យមានសកម្មភាពហិង្សានេះ។ ហើយបក្សកាន់អំណាចបានថ្កោលទោសចំពោះសកម្មភាពអុជអាលដែលនាំឱ្យមានការបិទផ្លូវ និងការអុកឡុករំខាននានា និងធ្វើឱុ្យប៉ះពាល់ដល់សណ្តាប់ធ្នាប់ និងរបៀបរៀបរយសង្គម។ នេះបើតាមសេចក្តីថ្លែងការណ៍របស់គណបក្សប្រជាជនកម្ពុជានៅថ្ងៃទី២ម្សិលមិញ។ ប៉ុន្តែគណបក្សសង្គ្រោះជាតិវិញ ក៏បានថ្កោលទោសរដ្ឋាភិបាលដែលបានប្រើប្រាស់អំពើហិង្សានេះ។
ថ្លែងប្រាប់វិទ្យុបារាំងអន្តរជាតិនៅថ្ងៃសុក្រនេះ លោក សម រង្ស៊ី ប្រធានគណបក្សសង្គ្រោះជាតិ បានទាត់ចោល យ៉ាងដាច់អហង្កាដែលថាបក្សសង្គ្រោះជាតិជាអ្នកអុជអាលអំពើហិង្សានេះ។ លោក សម រង្ស៊ី ថែមទាំងប្រកាសឱ្យមានមហាបាតុកម្មអហិង្សាធំមួយ ចាប់ពីចុងសប្តាហ៍នេះ។
ទោះបីជាបែបណា ដើម្បីដោះស្រាយបញ្ហាសង្គមនាពេលបច្ចុប្បន្ន គណបក្សប្រជាជនកម្ពុជា បានអះអាងថា មានតែការចរចាមួយតែប៉ុណ្ណោះ គឺជាដំណោះស្រាយមានប្រសិទ្ធភាព។ ជា មួយនឹងគោលជំហរឥតប្រែប្រួលរបស់ខ្លួន គណបក្សប្រជាជនកម្ពុជាបានស្នើឱ្យគណបក្សសង្គ្រោះជាតិវិលចូលតុចរចាជាបន្ទាន់ ដើម្បីរួមគ្នាដោះស្រាយបញ្ហាដោយសន្តិវិធី ដើម្បីបុព្វហេតុសន្តិភាព ស្ថិរភាព និងសេចក្តីសុខសង្គម។
លោក សម រង្ស៊ី គណបក្សសង្គ្រោះជាតិ បានបញ្ជាក់យ៉ាងច្បាស់ថា គណបក្សប្រឆាំងនឹងវិលចូលតុចរចាវិញភ្លាម ប្រសិនបើរដ្ឋាភិបាលបញ្ឈប់ការបង្ក្រាបអំពើហិង្សា និងដោះលែងមនុស្សដែលត្រូវបានចាប់ខ្លួនទាំងអស់ ក្នុងកំឡុងពេលប៉ះទង្គិចគ្នា ឱ្យមានសេរីភាពឡើងវិញ។
គួររំលឹកថា ដោយសារការផ្ទុះអំពើហិង្សាបង្ហូរឈាមនេះ បានបណ្តាលឱ្យការចរចាដ៏កម្ររវាងបក្សកាន់អំណាច និងបក្សប្រឆាំងដែលគ្រោងធ្វើនៅថ្ងៃទី៣ មករានេះ ត្រូវបានប្រកាសលុបចោលវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ