លោកវ៉ន ពៅនិងគ្នីគ្នា ត្រូវបានបញ្ជូនទៅតុលាការ ក្រោមសម្រែកតវ៉ារបស់សកម្មជនសិទ្ធិមនុស្ស
ប្រធានសមាគមប្រជាធិបតេយ្យឯករាជ្យ សេដ្ឋកិច្ចក្រៅប្រព័ន្ធ លោក វ៉ន ពៅ និងបាតុករដែលត្រូវបានចាប់ខ្លួនដោយកងកម្លាំងយោធាឆ័ត្រយោង៩១១ កាលពីថ្ងៃទី២មករាម្សិលមិញ ត្រូវបានបញ្ជូនទៅកាន់សាលាដំបូងរាជធានីភ្នំពេញហើយ នៅព្រឹកព្រលឹមស្រាងៗ ថ្ងៃទី៣មករានេះ។ អ្នកជាប់ឃុំទាំង១០នាក់ រួមទាំងលោកវ៉ន ពៅផង ត្រូវបានតុលាការចោទប្រកាន់ពីបទប្រើហិង្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
ពេញមួយព្រឹកថ្ងៃទី៣មករានេះ ក្រុមសកម្មជនសិទ្ធិមនុស្ស អ្នករត់ម៉ូតូឌុប អ្នករត់រ៉ឺម៉កកង់បី ព្រះសង្ឃ និងក្រុមអ្នកតវ៉ាសិទ្ធិដីធ្លីរាប់រយនាក់ បានប្រមូលផ្ដុំគ្នា បិទផ្លូវ តវ៉ានៅមុខសាលាដំបូងរាជធានីភ្នំពេញ។ ក្រុមអ្នកតវ៉ា ដែលបានអះអាងថា នឹងនៅតែបន្តរហូតទាល់តែសាលាដំបូង ដោះលែងលោកវ៉ន ពៅ និងបាតុករដែលជាប់ឃុំទាំងអស់សំឡេងតវ៉ាលាន់លឺកងរំពងនៅមុខសាលា ដំបូងរាជធានីភ្នំពេញ នៅព្រឹកថ្ងៃទី៣មករានេះ។ មហាវិថីព្រះមុនីរ៉េត ត្រូវបានបិទពីមុខផ្សារទំនើបស៊ីធីម៉ល រហូតជិតដល់អតីតរង្វង់មូលនាងគង្ហីង ដោយសកម្មជនសិទ្ធិមនុស្សជាង៣០០នាក់ ដែលក្នុងនោះរួមមាន អ្នករត់ម៉ូតូឌុប រ៉ឺម៉កកង់បី ព្រះសង្ឃ និងសកម្មជនតវ៉ាសិទ្ធិដីធ្លីផងដែរ។
នេះជាការតវ៉ា ទាមទារឲ្យសាលាដំបូងដោះលែងលោក វ៉ន ពៅ ប្រធានសមាគមប្រជាធិបតេយ្យឯករាជ្យ សេដ្ឋកិច្ចក្រៅប្រព័ន្ធ និងបាតុករដទៃទៀត សរុបចំនួន១០នាក់ ដែលត្រូវបានចាប់ខ្លួនកាលពីថ្ងៃទី២មករា និងត្រូវបញ្ជូនមកសាលាដំបូង តាំងពីព្រឹកព្រលឹមថ្ងៃទី៣មករានេះ។ អ្នកដែលជាប់ឃុំទាំងអស់ ត្រូវបានតុលាការចោទប្រកាន់ពីបទប្រើប្រាស់អំពើហិង្សា។ នេះបើតាមការឲ្យដឹងរបស់លោក ចាន់ សូវ៉េត មន្ដ្រីស៊ើបអង្កេត របស់អង្គការសិទ្ធិមនុស្ស អាដហុក។
នៅក្នុងការតវ៉ានាព្រឹកនេះ លោក កឹម សុខា អនុប្រធានគណបក្សសង្គ្រោះជាតិ ក៏បានលេចមុខមួយភ្លែតដែរ ដោយលោកបានទាមទារឲ្យសាលាដំបូង ដោះលែងអ្នកជាប់ឃុំទាំង១០នាក់ ឲ្យពួកគេចេញមកព្យាបាលរបួសឲ្យជាសះស្បើយសិន។ មន្ដ្រីស៊ើបអង្កេតអង្គការអាដហុក លោក ចាន់ សូវ៉េត បានលើកឡើងពីស្ថានភាពសុខភាពរបស់លោកវ៉ន ពៅ និងអ្នកជាប់ឃុំទាំង៩នាក់ផ្សេងទៀតថា មានលក្ខណៈធ្ងន់ធ្ងរ ដោយសារតែការវាយដំ ក្រោយការឃុំខ្លួន។
រហូតមកទល់ម៉ោង១២ថ្ងៃត្រង់នេះ នៅមិនទាន់មានការប៉ះទង្គិចណាមួយ រវាងក្រុមអ្នកតវ៉ា និងក្រុមសមត្ថកិច្ចជាច្រើននាក់ ដែលកំពុងមានវត្តមាននៅខាងមុខសាលាដំបូងរាជធានីភ្នំពេញទេ។ ក្រុមអ្នកតវ៉ា នៅតែបន្តសកម្មភាពរបស់ខ្លួន ដោយបិទផ្លូវ និងស្រែកទាមទារ ដដែល ក្រោមការអង្វរកររបស់កងកម្លាំងមានសមត្ថកិច្ច ដែលបានអំពាវនាវ ឲ្យក្រុមអ្នកតវ៉ា បញ្ឈប់ការបិទផ្លូវ ដើម្បីអាចឲ្យចរាចរណ៍ដំណើរការឡើងវិញ។ ប៉ុន្តែក្រុមអ្នកតវ៉ាបានអះអាងថា នឹងនៅតែបន្តសកម្មភាពរបស់ខ្លួន រហូតទាល់តែសាលាដំបូង ដោះលែងលោកវ៉ន ពៅ និងបាតុករដែលជាប់ឃុំទាំងអស់។
សូមរំលឹកថា នៅថ្ងៃទី០២មករា ម្សិលមិញនេះ មនុស្ស១៥នាក់ ក្នុងនោះរួមមាន លោក វ៉ន ពៅ សកម្មជនសិទ្ធិមនុស្ស និងកម្មករ ព្រមទាំងព្រះសង្ឃផង ត្រូវបានចាប់ខ្លួន នៅក្នុងការប៉ះទង្គិចគ្នាមួយ រវាងកងកម្លាំងយោធាឆ័ត្រយោង៩១១ និងក្រុមកម្មករ នៅមុខរោងចក្រយ៉ាកជីន ក្នុងខណ្ឌពោធិសែនជ័យ រាជធានីភ្នំពេញ។ ព្រះសង្ឃចំនួន៥អង្គ ដែលត្រូវបានចាប់ខ្លួន ត្រូវបានដោះលែងវិញ នៅពាក់កណ្ដាលអាធ្រាតថ្ងៃដដែល។ ដោយឡែក លោក វ៉ន ពៅ និងបាតុករដទៃទៀត សរុបចំនួន១០នាក់ ត្រូវបញ្ជូនមកសាលាដំបូង ដើម្បីសាកសួរ តាំងពីព្រឹកព្រលឹមថ្ងៃទី៣មករានេះ។
បណ្តាញអង្គការសង្គមស៊ីវិល និងសហជីពចំនួន៥ បានចេញសេចក្ដីថ្លែងការណ៍រួមមួយ ដោយហៅការបង្ក្រាប និងការចាប់ខ្លួនមនុស្ស ១០នាក់ ដោយកម្លាំងយោធា កាលពីថ្ងៃព្រហស្បតិ៍ម្សិលមិញ ថាជាការរំលោភសិទ្ធិមនុស្សធ្ងន់ធ្ងរ និងបង្ហាញនូវចរិតសម្លាប់មនុស្សដោយចេតនា។ សេចក្ដីថ្លែងការណ៍ដដែល បានអំពាវនាវឲ្យមានការដោះលែងអ្នកជាប់ឃុំទាំង១០នាក់ជាបន្ទាន់ ព្រមទាំងចាត់វិធានការចាប់ខ្លួនទាហានដៃដល់ ដែលបង្ក្រាបសកម្មសហជីព យកទៅផ្តន្ទាទោសតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ