ចប់ពីកូវីដ១៩ ទីភ្នាក់ងារថាមពលអន្តរជាតិ អំពាវនាវឲ្យផ្តល់សន្ទុះដល់វិស័យថាមពលដែលស្អាតស្អំ
ស្របពេលដែលប្រទេសជាច្រើន ជាពិសេសបណ្តាប្រទេសមហាអំណាច កំពុងរៀបចំគូសវាសផែនការ ដើម្បីផ្តល់សន្ទុះសេដ្ឋកិច្ច ក្រោយកូវីដ១៩ ទីភ្នាក់ងារថាមពលអន្តរជាតិ បានអំពាវនាវ រំលឹកថា ផែនការទាំងនោះ ត្រូវតែផ្តល់អាទិភាពដល់ការវិនិយោគ ក្នុងវិស័យថាមពលដែលកកើតឡើងវិញ។ ទីភ្នាក់ងារថាមពលអន្តរជាតិ លើកឡើងថា នេះគឺឱកាសដ៏ល្អ សម្រាប់ពិភពលោក ដើម្បីងើបចេញវិបត្តិ ហើយដើរលើផ្លូវដ៏ល្អ ដើម្បីកាត់បន្ថយការកើនឡើងនូវកំដៅផែនដី។
ចុះផ្សាយនៅថ្ងៃ៖
ស្តាប់ - ០២:២៨
ទីភ្នាក់ងារថាមពលអន្តរជាតិ អំពាវនាវ ឲ្យប្រទេសទាំងអស់ ដែលកំពុងតែគូសវាស ផែនការផ្តល់សន្ទុះសេដ្ឋកិច្ច ថាត្រូវតែផ្តល់អាទិភាព ដល់ការវិនិយោគក្នុងវិស័យផលិតថាមពលដែលកកើតឡើងវិញ ឬថាមពលដែលស្អាតស្អំមិនបញ្ចេញឧស្ម័នពុល។ រដ្ឋាភិបាលនានា ត្រូវតែផ្តោតការយកចិត្តទុកដាក់ ជួយដល់វិស័យដែលបង្កើតការងារ ហើយទិន្ទឹមនឹងនេះគឺជាវិស័យ ដែលចូលរូមកាត់បន្ថយការបញ្ចេញឧស្ម័នកាបូនិក ដែលជាប្រភពនៃការកើនឡើងកំដៅផែនដី។
គួរបញ្ជាក់ថា ដោយសារតែវិបត្តិបង្កឡើងដោយជម្ងឺកូវីដ១៩ វិស័យថាមពលកកើតឡើងវិញ អាចប្រឈមនឹងការចុះថយសក្តានុពល នៅក្នុងឆ្នាំ២០២០។ យោងតាមតួលេខរបស់ទីភ្នាក់ងារថាមពលអន្តរជាតិ បានឲ្យដឹងថា ការស្ថាបនាស្ថានីយផលិតថាមពលកកើតឡើងវិញ អាចកើនបានប្រមាណតែ៦%ប៉ុណ្ណោះក្នុងឆ្នាំនេះ តែវាក៏នៅតិចជាងឆ្នាំ២០១៩កន្លងទៅ ដល់ទៅ១៣% បើគិតពីចំនួនម៉េហ្កាវ៉ាត់នៃថាមពលដែលផលិតបាន។
លោក Fatih Birol អគ្គនាយកទីភ្នាក់ងារថាមពលអន្តរជាតិ បានលើកឡើងថា សកម្មភាពសាងសង់ ស្ថាបនាស្ថានីយផលិតថាមពល បានអាក់ខាន រីចុះថយដោយសារមួយផ្នែកមកពីវិធានការបិទខ្ទប់ ដើម្បីបង្ការការឆ្លងរាលដាលជំងឺកូវីដ១៩។ តែមូលហេតុមួយទៀត និងដែលគ្រោះថ្នាក់បំផុតនោះ គឺឧបសគ្គហិរញ្ញវត្ថុ ពោលគឺគ្មានការបញ្ចេញប្រាក់មកវិនិយោគ ក្នុងវិស័យនេះ។ លោកអគ្គនាយកទីភ្នាក់ងារថាមពលអន្តរជាតិ បានបារម្ភថាឆ្នាំ២០២០ ការស្ថាបនាស្ថានីយផលិតថាមពលដែលស្អាតស្អំ អាចថយចុះចំនួន១ភាគ៣នៅអឺរ៉ុប ដែលនេះជាការចុះថយខ្លាំង បើគិតពីឆ្នាំ១៩៩៦មក។
លោក Fatih Birol បានសង្កត់ធ្ងន់ថា ឆ្លងកាត់វិបត្តិកូវីដ១៩នេះ យើងបានសង្កេតឃើញថា ប្រភពថាមពលដើរដោយកង្ហាខ្យល់ ដើរដោយពន្លឺព្រះអាទិត្យ ឬថាមពលបានមកពីប៊ីយ៉ូម៉ាស និងវារីអគ្គីសនីជាដើម គឺមានភាពរឹងមាំខ្លាំង មិនដូចវិស័យឧស្សាហកម្មប្រេងឆៅឡើយ។ តែទោះយ៉ាងនេះក្តី លោកអគ្គនាយកទីភ្នាក់ងារថាមពលអន្តរជាតិ បានបារម្ភថា អ្នកវិនិយោគ អាចបោះបង់ចោលគម្រោងនានា ក្នុងការផលិតថាមពលដែលស្អាតស្អំ ដោយសារតែពួកគេ ឃើញតម្លៃប្រេងចុះថោកខ្លាំង។
លោកបន្ថែមថា ដូច្នេះ រដ្ឋាភិបាលត្រូវតែយកចិត្តទុកដាក់ ចាត់វិធានការយ៉ាងណា ផ្តល់ទំនុកចិត្តដល់អ្នកវិនិយោគនៅក្នុងវិស័យថាមពលកកើតឡើងវិញនេះ។ ក្រោយចប់វិបត្តិកូវីដ១៩ ពិភពលោកគួរតែឆក់ឱកាស ដើម្បីឈានទៅដើរលើផ្លូវមួយ ដែលនាំយើងទៅសម្រេចបាន នូវផែនការប្រយុទ្ធប្រឆាំងនឹងបម្រែបម្រួលអាកាសធាតុ ដែលជាបញ្ហាសកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ