អ.ស.ប. ប្រកាសស្វែងរកជំនួយមនុស្សធម៌ ៤៦,៤ ពាន់លានដុល្លារសម្រាប់ឆ្នាំថ្មី ២០២៤
ជិតដាច់ឆ្នាំចាស់ផ្លាស់ឆ្នាំថ្មី អង្គការសហប្រជាជាតិ (អ.ស.ប.) ប្រកាសអំពាវនាវស្វែងរកជំនួយសម្រាប់ជួយសង្គ្រោះជនរងគ្រោះដោយសារជម្លោះសង្គ្រាម វិបត្តិប្រែប្រួលអាកាសធាតុ និងរងគ្រោះពីវិបត្តិសេដ្ឋកិច្ចធ្ងន់ធ្ងរ។ នៅឆ្នាំ២០២៤ខាងមុខនេះ អ.ស.ប.បញ្ជាក់ថាត្រូវការកញ្ចប់ថវិកាមូលធិនិមនុស្សធម៌ ៤៦,៤ ពាន់លានដុល្លារ ដើម្បីទ្រទ្រង់គម្រោងប្រតិបត្តិការជួយសង្គ្រោះ នៅក្នុងប្រទេសជាង ៧០។ តាមរយៈជំនួយនេះ អ.ស.ប.បង្ហាញក្តីសង្ឃឹមថានឹងអាចជួយស្រោចស្រង់អាយុជីវិតមនុស្សចំនួន ១៨០,៥ លាននាក់ ក្នុងពិភពលោក។
ចុះផ្សាយនៅថ្ងៃ៖
ស្តាប់ - ០២:២៧
មូលនិធិជំនួយមនុស្សធម៌ ឆ្នាំ២០២៤ គឺដើម្បីផ្តល់ដល់ប្រតិបត្តិការនៅក្នុងប្រទេស ចំនួន ៧២។ ក្នុងនោះ ២៦ ជារដ្ឋដែលកំពុងជួបវិបត្តិធ្ងន់ធ្ងរ ដូចជា សង្គ្រាម ជម្លោះប្រដាប់អាវុធ ហើយនិង ៤៦ ទៀត គឺប្រទេសកំពុងជួបបញ្ហា រងការលំបាក ដូចជា វិបត្តិជនភៀសខ្លួន, ភៀសខ្លួនព្រោះតែវិបត្តិប្រែប្រួលអាកាសធាតុ និងរងគ្រោះពីវិបត្តិសេដ្ឋកិច្ចធ្ងន់ធ្ងរ ជាដើម។
អ.ស.ប. លម្អិតថានឹងផ្តល់ជំនួយជាចម្បងទៅដល់ ប្រទេសស៊ីរី ៤,៤ ពាន់លានដុល្លារ, ផ្តល់ជំនួយទៅប្រទេសអ៊ុយក្រែន ៣,១ ពាន់លានដុល្លារ, ជួយទៅ អាហ្វហ្កានីស្ថាន ៣ ពាន់លានដុល្លារ, អេត្យូពី ២,៩ ពាន់លានដុល្លារ, ហើយនិង យេម៉ែន ២,៨ ពាន់លានដុល្លារ។ នេះបើតាមលោក Martin Griffiths ប្រធានផ្នែកប្រតិបត្តិការមនុស្សធម៌ នៃ អ.ស.ប. គូសបង្ហាញក្នុងសេចក្តីប្រកាសស្វែងរកជំនួយ ឆ្នាំ២០២៤ ចុះផ្សាយថ្ងៃច័ន្ទ ទី១០ធ្នូ ។
អ.ស.ប. ក៏លើកឡើងអំពីប្រទេសរងគ្រោះខ្លាំងព្រោះតែការប្រែប្រួលអាកាសធាតុ។ ភាគច្រើន ការប៉ះពាល់ជាដំបូងបំផុត គឺប្រទេសក្នុងតំបន់មជ្ឈិមបូព៌ា និងតំបន់អាហ្វ្រិកខាងត្បូង ដែលត្រូវផ្តល់ជំនួយមនុស្សធម៌ ចំនួន ១៣,៩ ពាន់លានដុល្លារ សម្រាប់ប្រតិបត្តិការជួយសង្គ្រោះ។
នៅក្នុងសេចក្តីប្រកាសស្វែងរកជំនួយ គឺ អ.ស.ប. ក៏បង្ហាញអំពីការព្យាករប្រមើលឃើញថា ក្នុងនៅឆ្នាំ២០២៤ គឺអាចនឹងមានមនុស្ស ប្រមាណ ៣០០ លាននាក់ ត្រូវការជំនួយសង្គ្រោះ ។ ប៉ុន្តែ អ.ស.ប. ថានឹងមានកញ្ចប់ថវិកាសម្រាប់ជួយតែ ១៨០,៥លាននាក់ប៉ុណ្ណោះ សល់ពីនោះ គឺជនរងគ្រោះអាចនឹងទទួលជំនួយពីអង្គការអន្តរជាតិផ្សេងទៀត ហើយនិងជំនួយរបស់រដ្ឋាភិបាលគេនីមួយៗ។
តាមរបាយការណ៍ គឺក្នុងឆ្នាំ២០២៣ អ.ស.ប. ទទួលជំនួយអំណោយមនុស្សធម៌តិចតួចជាងឆ្នាំណាៗទាំងអស់។ ពោលគឺឆ្នាំ២០២៣ អ.ស.ប. បានអំពាវនាវស្វែងរកជំនួយទំហំទឹកប្រាក់ ៥៦,៧ ពាន់លានដុល្លារ ប៉ុន្តែ ទទួលបានតែ ៣៥% តែប៉ុណ្ណោះ។ ដូច្នេះ សម្រាប់ឆ្នាំថ្មី ឆ្នាំ២០២៤ អ.ស.ប សើរើមើលឡើងវិញពីការស្វែងរកមូលនិធិជំនួយនានា ហើយនិងថ្លឹងថ្លែងជ្រើសរើសប្រទេសឬតំបន់ណាដែលត្រូវការចាំបាច់ខ្លាំង និងបន្ទាន់ជាងគេ ដើម្បីជួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ