Nissan សន្យាផលិតរថយន្តអគ្គិសនី ឲ្យបាន៥០% ពីនេះដល់ឆ្នាំ២០៣០
ក្រុមហ៊ុនផលិតរថយន្តជប៉ុននីសាន់ បានអះអាងអាងនៅថ្ងៃទី២៩វិច្ឆិកានេះថា ខ្លួននឹងសម្រេចឲ្យបានកម្មវត្ថុ ផលិតរថយន្តអគ្គិសនី ឲ្យបាន៥០% ពីនេះ រហូតដល់ឆ្នាំ២០៣០។ យោងតាមឯកសារយុទ្ធសាស្ត្ររបស់ក្រុមហ៊ុននីសាន់ ពីនេះដល់ឆ្នាំ២០៣០ ក្រុមហ៊ុននឹងផលិតរថយន្ត យ៉ាងហោច ២៣ម៉ូដែលថ្មី ដែលដើរដោយចរន្តអគ្គិសនី។
ចុះផ្សាយនៅថ្ងៃ៖
នីសាន់ (Nissan) ធ្លាប់ជាក្រុមហ៊ុន ដែលបាននាំមុខគេ ក្នុងការចាប់ផ្តើមផលិតរថយន្ត ដើរដោយចរន្តអគ្គិសនី ជាមួយនឹងរថយន្តមូដែល Leaf ចេញនៅឆ្នាំ២០១០។ ក៏ប៉ុន្តែក្រោយមក នីសាន់ ត្រូវបានក្រុមហ៊ុនផ្សេងៗ ដូចជា តេសឡា ជាដើមវ៉ាលឿនដាច់ទៅមុខ។
ដោយសហការជាមួយក្រុមហ៊ុនផលិតរថយន្តបារាំង Renault ក្រុមហ៊ុននីសាន់ សន្យាថា នៅរវាងឆ្នាំ២០៣០ ខ្លួននឹងផលិតរថយន្តដើរដោយចរន្តអគ្គិសនី ចំនួន៥០% នៃទំហំផលិតរបស់ខ្លួន។ សម្រាប់ទីផ្សារជប៉ុនវិញ តួលេខនេះ នឹងមានចំនួន ៥៥% ហើយនៅទីផ្សារចិន នឹងមានចំនួន៤០%។ ក្នុងចំណោមរថយន្តម៉ូដែលថ្មី ដើរដោយចរន្តអគ្គិសនី ចំនួន២៣ម៉ូដែល ដែលនីសាន់ និងផលិត គឺមាន ១៥ម៉ូដែល ជាម៉ូដែលអគ្គិសនី១០០%។
យោងតាមឯកសារយុទ្ធសាស្ត្រ របស់នីសាន់ ចេញផ្សាយនៅថ្ងៃទី២៩វិច្ឆិកា គឺនីសាន់ គ្រោងនឹងស្រវាក្តោមឲ្យបាន ៧៤%នៃការលក់រថយន្តអគ្គិសនីនៅអឺរ៉ុប នៅរវាងឆ្នាំ២០២៦-២៧។ លោក Makoto Uchida អគ្គនាយកនីសាន់ បានលើកឡើងទស្សនវិស័យនេះ គឺជាទស្សនវិស័យដ៏ក្លាហាន ដែលវិបត្តិអាកាសធាតុបានដាក់កំហិត ឲ្យក្រុមហ៊ុនត្រូវបោះពួយ ប្រឹងប្រែងក្នុងវិស័យនេះ។ ដើម្បីពន្លឿនសន្ទុះនេះ នីសាន់ និងបន្ថែមថវិកាវិនិយោគ ឲ្យបានប្រមាណ ២០០ម៉ឺនលានយ៉េន ដែលស្នើនឹង ១៥.៦ពាន់លានអឺរ៉ូ ក្នុងរវាង៥ឆ្នាំទៀត។
គួរកត់សំគាល់ថា ជាមួយនឹងវិធានការកាត់បន្ថយឧស្ម័នផ្ទះកញ្ចក់ ក្រុមហ៊ុនផលិតរថយន្តមួយចំនួន បានសន្យាបង្កើនភាគរយនៃការផលិតរថយន្ត ដើរដោយចរន្តអគ្គិសនី ហើយក្រុមហ៊ុនខ្លះទៀត ដូចជា វ៉ុលវ៉ូ (Volvo) ជាដើម បានសន្យាថា នឹងឈប់ផលិតរថយន្តប្រើម៉ាស៊ីនចំហេះប្រេង នៅចាប់ពីឆ្នាំ២០៣០ទៅ។ ចំណែកក្រុមហ៊ុន Honda សន្យាថានឹងលក់តែរថយន្តអគ្គិសនីសុទ្ធតែម្តង ចាប់ពីឆ្នាំ២០៤០ទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ