អង្គការOpec បន្ទាបការពន្យាករណ៍បន្ថែមទៀតចំពោះសំណើទិញប្រេងពិភពលោក
ថ្ងៃព្រហស្បតិ៍ទី១២ឧសភា អង្គការនៃក្រុមប្រទេសផលិតនាំចេញប្រេងពិភពលោក ហៅថា Opec បានបន្ទាបការព្យាករណ៍របស់ខ្លួនជាថ្មីទៀត ចំពោះកំណើននៃសំណើបញ្ជាទិញប្រេង។ ពោលគឺគេនៅតែយល់ថា កំណើបញ្ជាទិញប្រេងនៅតែបន្តមានតិចតួច។ មានតិចព្រោះតែវិបត្តិសកលលោក តួយ៉ាងសង្គ្រាមរុស្ស៊ីនិងអ៊ុយក្រែន, អតិថរណាទំនិញ ហើយនិងភាពមិនច្បាស់លាស់ថ្មីបន្ថែមទៀត ជុំវិញវិបត្តិជំងឺកូវីដ១៩នៅប្រទេសចិន។ ភាពមិនច្បាស់លាស់ទាំងនេះ ធ្វើឲ្យប្រទេសផលិតប្រេង នៅតែកាត់បន្ថយការផលិត បើទោះបីជាមានប្រទេសខ្លះ ជំរុញឲ្យផលិតឲ្យច្រើនៗមកក្តី។
ចុះផ្សាយនៅថ្ងៃ៖
ស្តាប់ - ០២:១៧
ប៉ុន្មានខែជាប់ៗគ្នានេះ អង្គការ Opec បានកាត់បន្ថយការផលិតប្រេង ហើយពេលនេះ ក៏គេនៅចង់បន្ថយចំនួនបូមប្រេងជាបន្តទៀត។ ការបន្ថយនេះ ព្រោះតែវិបត្តិផ្សេងៗជាច្រើន និងដែលបណ្តាលឲ្យតម្លៃប្រេងសាំងឡើងថ្លៃជាសកល។ ប្រឈមមុខនឹងការឡើងថ្លៃប្រេងពេក កាលពីខែមុននេះ ប្រទេសផ្សេងៗ បានស្នើសុំឲ្យ អង្គការក្រុមប្រទេសផលិតនិងនាំចេញប្រេង Opec ផលិតប្រេងឲ្យកាន់តែច្រើន ដើម្បីផ្គត់ផ្គង់តម្រូវការពិភពលោក ក៏ប៉ុន្តែ លទ្ធផលដែលបង្ហាញនៅក្នុងរបាយការណ៍ខែឧសភានេះ គឺ អង្គការប្រទេសនាំចេញប្រេង មិនបានផលិតបូមប្រេងតាមការយល់ព្រមព្រៀងគ្នាទេ។
អ្នកជំនាញពន្យល់ថា ប្រេងឡើងថ្លៃខ្លាំង សព្វថ្ងៃនេះ ព្រោះតែមានការផលិតនិងនាំចេញតិច។ គេផលិតនិងនាំចេញតិច ព្រោះតែមានហេតុផលមិនច្បាស់លាស់បីជាសំខាន់។ ទី១ ជំងឺកូវីដ ដែលអូសបន្លាយយូរមកហើយ និងកំពុងតែបណ្តាលឲ្យមានការបិទខ្ទប់ប្រទេសនៅផ្នែកខ្លះបន្តទៀត នៅស្រុកចិន។ ទី២ គឺសង្គ្រាមនៅអ៊ុយក្រែន-រុស្ស៊ី ដែលសហរដ្ឋអាមេរិក និងសម្ព័ន្ធមិត្តអឺរ៉ុប ប្រកាសហាមបញ្ជាទិញប្រេងឆៅនិងឧស្ម័នពីរុស្ស៊ី។ ទី៣ ប្រឈមនឹងវិបត្តិសកលនិងភាពមិនច្បាស់លាស់ផ្សេងៗ គឺធ្វើឲ្យប្រទេសផលិតប្រេង នៅតែកាត់បន្ថយការផលិត បើទោះបីជា ប្រទេសខ្លះ ជំរុញឲ្យផលិតឲ្យប្រេងឲ្យច្រើនៗនោះក្តី។ ចំណែកសំណើបញ្ជាទិញប្រេងទុកជាមុន ក៏មានការធ្លាក់ចុះជាសកលដែរ។ អង្គការOpecនៅថ្ងៃព្រហស្បតិ៍ទី១២ឧសភា បានបន្ទាបការព្យាករណ៍ចំពោះការបញ្ជាទិញប្រេងថែមទៀត។ ការផលិតបូមប្រេងថយចុះ ហើយ ប្រទេសអ្នកផលិត ក៏មិនហ៊ាននឹងដំឡើងការផលិតបន្ថែមដែរ។ បាតុភាពនេះ គឺលំបាកសម្រាប់អ្នកប្រើប្រាស់ប្រេង។ អ្នកជំនាញ មើលឃើញថា តម្លៃប្រេងសាំង គឺអាចនឹងបន្តតែឡើងថ្លៃជាច្រើនខែតទៅទៀត ឬអាចរហូតដល់ដើមឆ្នាំ ២០២៣ ផង។
ជាការកត់សម្គាល់មួយ អឺរ៉ុប ដែលធ្លាប់បានជជែកគ្នា ធ្វើច្បាប់ និងដាក់ទណ្ឌកម្មលើរុស្ស៊ី តែបើទោះបីជាយ៉ាងនេះក្តី ក៏ រុស្ស៊ី នៅតែបន្តជាប្រទេសនាំចេញប្រេងទៅអឺរ៉ុបច្រើននៅឡើយ។ ពោលគឺជាង៤៣ភាគរយនៃការនាំចេញប្រេងរបស់ក្រុងម៉ូស្កូ គឺនាំចេញទៅ អឺរ៉ុប។
អង្គការប្រទេសផលិតនាំចេញប្រេង Opec+ គឺមានរដ្ឋសមាជិកចំនួន២៣ ដែលត្រូវជួបប្រជុំគ្នារៀងរាល់ខែនៅក្រុងវីយែន ដើម្បីគិតគូរពីចំនួនប្រែងដែលត្រូវចាក់ចូលក្នុងទីផ្សារសកលលោក។ បើនិយាយតែ Opec ទទេគឺមាន១៣សមាជិក រដ្ឋសំខាន់ៗជាងគេនៅដើមបូព៌ានិងអាហ្វ្រិក។ សព្វថ្ងៃ Opec ផលិតប្រេងនាំចេញស្មើនឹង៣០ភាគរយនៃប្រេងចរាចរណ៍លើពិភពលោក ក្នុងនោះគ្រាន់តែ Arabie saoudite ផលិតបាន១០លានបារីលក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ