លោក ហ៊ុន សែន បញ្ជាអាជ្ញាធរត្រៀមបង្រ្កាបការតវ៉ាខណៈក្រុមអ្នកតវ៉ាណាហ្គាគ្រោងធ្វើកូដកម្មទ្រង់ទ្រាយធំ
រដ្ឋាភិបាលកម្ពុជា ឆ្លងកាត់ការប្រជុំគណៈរដ្ឋមន្ត្រីនាថ្ងៃសុក្រ បានប្រាប់ដល់អាជ្ញាធររាជធានី-ខេត្ត ឲ្យត្រៀមចាត់វិធានការ ចំពោះការប្រមូលផ្តុំតវ៉ា ដោយខុសច្បាប់។ ការណែនាំបែបនេះ ជួនចំពេលដែល ក្រុមអ្នកតវ៉ាណាហ្គាវើលដ៍គ្រោងធ្វើកូដកម្មទ្រង់ទ្រាយធំ ក្រោយមិនមានដំណោះស្រាយអ្វីជាដុំកំភួន។
ចុះផ្សាយនៅថ្ងៃ៖
ស្តាប់ - ០២:១៥
តាមបញ្ជារបស់ប្រមុខរដ្ឋាភិបាលកម្ពុជា អាជ្ញាធរមានសមត្ថកិច្ច កងកម្លាំងប្រដាប់អាវុធ រាជធានី-ខេត្តទាំងអស់ ត្រូវចាត់វិធានការតាមផ្លូវច្បាប់ឲ្យបានម៉ឺងម៉ាត់បំផុត ចំពោះគ្រប់បុគ្គល ឬក្រុមតវ៉ាណា ដែលបង្កភាពអនាធិបតេយ្យលើដងផ្លូវ តាមរយៈការប្រមូលផ្តុំគ្នាតវ៉ា ធ្វើបាតុកម្ម បិទផ្លូវសាធារណៈដោយខុសច្បាប់។
ការបង្គាប់បញ្ជារបស់ប្រមុខរដ្ឋាភិបាលកម្ពុជា លោក ហ៊ុន សែន យ៉ាងដូច្នេះ ត្រូវបានសហជីព និងសង្គមស៊ីវិល សម្តែងនូវក្តីព្រួយបារម្ភ ចំពោះសិទ្ធិសេរីភាពរបស់ក្រុមអ្នកតវ៉ាដោយសន្តិវិធី ជាពិសេសករណីវិវាទការងារណាហ្គាវើលដ៍ ដែលកំពុងអូសបន្លាយយ៉ាងរ៉ាំរ៉ៃ។
កញ្ញា ឈឹម ស៊ីថរ សហជីពតំណាងកម្មករណាហ្គាវើលដ៍ លើកឡើងថា បើរដ្ឋាភិបាលដាក់ចេញវិធានការបែបនេះ នឹងរំលោភសិទ្ធិក្រុមអ្នកតវ៉ាកាន់តែខ្លាំង ខណៈដែលកន្លងមកក្រុមអ្នកតវ៉ា តែងតែរងការបង្រ្កាបពីអាជ្ញាធរ។ បើតាមសហជីពរូបនេះ គឺខាងកម្លាំងសមត្ថកិច្ចតែងតែរារាំង មិនឲ្យក្រុមអ្នកតវ៉ាប្រមូលនៅមុខក្រុមហ៊ុនណាហ្គាវើលដ៍ ទើបក្រុមអ្នកតវ៉ាត្រូវបង្ខំចិត្តប្រមូលផ្តុំគ្នាតវ៉ា នៅតាមដងផ្លូវ។
លោក សឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក យល់ឃើញថា ប្រទេសប្រកាន់លទ្ធិប្រជាធិបតេយ្យ មិនដែលជ្រើសយកវិធានការបែបហ្នឹង តែគួរណាស់ ជួយសម្របសម្រួល ការពារសន្តិសុខសណ្តាប់ធ្នាប់ នៅពេលដែលក្រុមកូដករធ្វើកូដកម្មដោយសន្តិវិធី។ លោកថា អ្វីដែលរដ្ឋាភិបាលគួរតែអំពាវនាវ កុំឲ្យមានការប៉ះទង្គិច ឬការបង្រ្កាបទៅលើក្រុមកូដករ ដែលពួកគេទាមទារអ្វីមួយនោះ។
ការដាក់ចេញបញ្ជាបែបនេះ លោក សឹង សែនករុណា បានបង្ហាញក្តីបារម្ភព្រួយបារម្ភថ្មី សម្រាប់ក្រុមអង្គការសង្គមស៊ីវិល ចំពោះក្រុមកូដករណាហ្គាវើលដ៍ ដែលទាមទារឲ្យមានដំណោះស្រាយ ជុំវិញវិវាទការងារដ៏រ៉ាំរ៉ៃ។
គួរបញ្ជាក់ថា ក្រុមអង្គការមួយចំនួន បានប្រមូលផ្តុំគ្នាជាមួយក្រុមកម្មករតវ៉ា ដោយអាននូវលិខិតចំហមួយ ទទូចឲ្យលោកនាយករដ្ឋមន្ត្រី ហ៊ុន សែន ចាត់វិធានការដោះស្រាយវិវាទការងាររបស់ក្រុមកម្មករ។ លិខិតចំហដែលមានការចូលរួមពីសង្គមស៊ីវិល៤០ស្ថាប័ន លើកឡើងថា ការពន្យាពេលមិនដោះស្រាយវិវាទការងារនេះ គឺជាចេតនាបំបាក់ស្មារតី និងដាក់សម្ពាធសេដ្ឋកិច្ចដល់កូដករ ឲ្យឈានទៅបញ្ចប់ការតវ៉ា។ ក្រុមអង្គការសង្គមស៊ីវិល បញ្ជាក់ថា ប្រសិនបើគ្មានដំណោះស្រាយ ពួកគេនឹងចូលរួមធ្វើកូដកម្មជាលក្ខណៈទ្រង់ទ្រាយធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ