អង្គការពាណិជ្ជកម្មពិភពលោក បើកប្រជុំជជែកសំណុំរឿងពីរដ៏តឹងតែង
ការឧបត្ថម្ភធនសម្រាប់វិស័យនេសាទ និង ការបើកផ្លូវអនុញ្ញាតឲ្យលើកលែងកម្មសិទ្ធិបញ្ញារយៈពេលខ្លី សម្រាប់ការផលិតថ្នាំបង្ការកូវីដ១៩ គឺជាសំណុំរឿងពីរដ៏តឹងតែង ដែលអង្គការពាណិជ្ជកម្មពិភពលោក ត្រូវបើកប្រជុំជជែកគ្នា។ ប្រធានបទយ៉ាងតឹងតែងពីរនេះ ដែលប្រទេសចំនួន ១៦៤ ត្រូវជជែកពិភាក្សានិងចរចាគ្នា នៅទីក្រុង ហ្សឺណែវ ចាប់ពីថ្ងៃអាទិត្យ ទី១២ រហូតដល់ថ្ងៃទី១៥ មិថុនា។ នេះគឺជាកិច្ចប្រជុំថ្នាក់រដ្ឋមន្ត្រីពាណិជ្ជកម្ម ដែល អង្គការពាណិជ្ជកម្មពិភពលោក រៀបចំធ្វើ រយៈពេល៤ឆ្នាំម្តង។
ចុះផ្សាយនៅថ្ងៃ៖
ស្តាប់ - ០២:២១
សំណុំរឿងរស៊ើបទី១ គឺការស្នើសុំផ្អាកការអនុវត្តច្បាប់កម្មសិទ្ធិបញ្ញា ចំពោះការផលិតថ្នាំបង្ការកូវីដ១៩ ដើម្បី អាចអនុញ្ញាតឲ្យក្រុមហ៊ុនឱសថណា ឬប្រទេសណាក៏អាចផលិតបាន ដោយផ្អែកទៅលើរូបមន្តដែលបានរកឃើញរួចស្រេចហើយ។
ប្រឈមនឹងវិបត្តិជំងឺសកលដ៏ធ្ងន់ធ្ងរ ជាច្រើនខែឆ្នាំមកនេះ ប្រទេសក្រីក្រស្នើសុំឲ្យលើកលែងរយៈពេលខ្លី ចំពោះការអនុវត្តច្បាប់ស្តីពីកម្មសិទ្ធិបញ្ញា សម្រាប់វ៉ាក់សាំងប្រឆាំងកូវីដ និងគ្រឿងបរិក្ខារផលិតថ្នាំនេះ រួមទាំងថ្នាំពេទ្យផ្សេងទៀត ដែលសម្រាប់ព្យាបាលជំងឺកូវីដ។ ជាសំណើដែលធ្វើស្នើដោយប្រទេសឥណ្ឌា និងអាហ្វ្រិកខាងត្បូង ហើយ រឿងនេះ សហរដ្ឋអាមេរិកនិងសហភាពអឺរ៉ុប ក៏បានជជែកគ្នាខ្លះៗរួចមកហើយ ប៉ុន្តែ មិនទាន់អាចរកច្រកចេញបាន។
បើតាមសំណុំអត្ថបទដែលរដ្ឋមន្ត្រីពាណិជ្ជកម្មត្រូវជជែកគ្នានោះ គឺការសុំផ្អាកការអនុវត្តច្បាប់កម្មសិទ្ធិបញ្ញាជុំវិញការផលិតថ្នាំបង្ការកូវីដ១៩នេះ គឺលើកលែងសម្រាប់តែប្រទេសក្រីក្រី និងប្រទេសកំពុងអភិវឌ្ឍតែប៉ុណ្ណោះ ហើយករណីនេះ ពុំមានលើកលែងចំពោះ ប្រទេស ចិន ឡើយ។ ទោះបីជាយ៉ាងនេះក្តី សំណុំរឿងនេះ ត្រូវក្រុមហ៊ុនឧស្សាហកម្មឱសថធំៗ បានច្រានចោល ព្រោះវាទាក់ទងនឹងផលប្រយោជន៍សេដ្ឋកិច្ចរបស់ខ្លួន។ ដូច្នេះហើយ បានជាក្រុមអង្គការសង្គមស៊ីវិល ជាច្រើន បានយល់ថា ការជជែកគ្នាពីរឿងនេះ ប្រហែលជាមិនបានទៅវែងឆ្ងាយនោះទេ។
ប្រធាបទមួយទៀត គឺការនេសាទ។ ការនេសាទ នៅទូទាំងពិភពលោក នារយៈពេល២០ឆ្នាំចុងក្រោយនេះ គឺលើសកម្រិតខ្លាំងពេក ហើយវានាំឲ្យខូចខាតដល់ជីវៈចម្រុះ និងការធានានិរន្តរភាពពូជត្រី។ ប្រទេសសមាជិកមួយចំនួន របស់អង្គការពាណិជ្ជកម្មពិភពលោក បានលើកឡើងពីការស្នើសុំឲ្យបញ្ឈប់ការឧបត្ថម្ភធនចំពោះវិស័យនេសាទ ដែលអ្នកជំនាញខ្លះយល់ថា វាបានធ្វើឲ្យកើតមានការនេសាទច្រើនហួសកម្រិត ហើយនិងការនេសាទខុសច្បាប់ផង។ អ្នកជំនាញបានព្រមានហើយថា បើគេនៅតែរង់ចាំយូរទៀត គេនឹងបាត់បង់ត្រី ហើយបើត្រីបាត់បង់ ជីវិតមនុស្សនឹងរងគ្រោះដែរ។
សំណុំរឿងពីរនេះ គឺជាតេស្តសាកល្បងសមត្ថភាពជាបន្ថែមសម្រាប់ អង្គការពាណិជ្ជកម្មពិភពលោក ខណៈដែលមានប្រទេសធំៗជាច្រើន កំពុងតែចង់ឲ្យ អង្គការពាណិជ្ជកម្មពិភពលោក កែទម្រង់ ជាច្រើនវិស័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ