អ.ស.ប.៖ ទំហំវិនិយោគដោយផ្ទាល់ពីបរទេស ចាប់ផ្តើមធ្លាក់ចុះជាថ្មី នៅឆ្នាំ២០២២
គិតចាប់ពីដើមឆ្នាំ២០២២មក ទំហំនៃការវិនិយោគដោយផ្ទាល់ពីបរទេស ទូទាំងពិភពលោក បានចាប់ផ្តើមធ្លាក់ចុះជាថ្មី នៅក្រោយវិបត្តិជំងឺឆ្លងកូវីដ១៩បានធូរស្រាល។ នេះបើផ្អែកតាមរបាយការណ៍មួយ របស់គណកម្មការទទួលបន្ទុកពាណិជ្ជកម្ម និងការអភិវឌ្ឍន៍ នៃអង្គការសហប្រជាជាតិ។ វិបត្តិសង្គ្រាមអ៊ុយក្រែន បានបង្កឲ្យមានវិបត្តិ៣ផ្ទួនគ្នា ក្នុងពេលតែមួយ គឺវិបតិ្តស្បៀងអាហារ វិបត្តិថាមពល និងវិបត្តិហិរញ្ញវត្ថុ ដែលកំពុងដាក់សំពាធយ៉ាងខ្លាំង ទៅលើការវិនិយោគនានា។
ចុះផ្សាយនៅថ្ងៃ៖
ស្តាប់ - ០២:៣៣
“បរិយាកាសវិនិយោគអន្តរជាតិ នៅទូទាំងពិភពលោក បានផ្លាស់ប្តូរក្រឡាប់ចាក់ទាំងស្រុង ពីល្អមកជាអាក្រក់ បន្ទាប់ពីសង្គ្រាមនៅអ៊ុយក្រែនបានចាប់ផ្តើម”។ នេះគឺជាការលើកឡើង របស់លោកស្រី Rebeca Grynspan អគ្គលេខាធិការ គណកម្មការទទួលបន្ទុកកិច្ចការពាណិជ្ជកម្ម និងអភិវឌ្ឍន៍ នៃអង្គការសហប្រជាជាតិ Cnuced នៅក្នុងរបាយការណ៍ចេញផ្សាយថ្ងៃទី៩មិថុនា។ លោកស្រីបានអះអាងថា ភាពមិនប្រាកដប្រជា មកប្រឈមហានិភ័យខ្ពស់ អាចនឹងដាក់សំពាធ មកលើសកម្មភាពនៃការវិនិយោគដោយផ្ទាល់ពីបរទេស នៅក្នុងឆ្នាំ២០២២នេះ។
យោងតាមរបាយការណ៍ តួលេខបឋមនៅត្រីមាសទី១ដើមឆ្នាំ២០២២ បានបង្ហាញសញ្ញាណចុះខ្សោយ ចំនួន២១% នៃចំនួនវិនិយោគថ្មី « Greenfield » ខណៈដែល ប្រតិបត្តិការហិរញ្ញវត្ថុសម្រាប់គម្រោងបរទេស បានចុះថយចំនួន៤%។
គួររំលឹកថា ទំហំនៃការវិនិយោគដោយផ្ទាល់ពីបរទេស IDE នៅទូទាំងពិភពលោក បានធ្លាក់ចុះខ្លាំង ក្នុងឆ្នាំ២០២០ដោយសារតែវិបត្តិជំងឺឆ្លងកូវីដ១៩។ តែនៅឆ្នាំ២០២១ សន្ទុះនៃការវិនិយោគ បានកើនឡើងវិញ ជិតស្មើនៅពេលមុនមានកូវីដ ពោលគឺមានទឹកប្រាក់សរុបប្រមាណ ១៥៨០ពាន់លានដុល្លារ។ ក្នុងឆ្នាំ២០២១ លំហូរមូលធនវិនិយោគ នៅតាមប្រទេសកំពុងអភិវឌ្ឍន៍ បានកើនឡើងចំនួន៣០% ក្នុងទំហំទឹកប្រាក់សរុប ចំនួន ៨៣៧ពាន់លានដុល្លារ។ នេះគឺជាទំហំវិនិយោគ កើនឡើងខ្ពស់មិនធ្លាប់មាន ជាពិសេសនៅតំបន់អាស៊ី។
ដោយឡែក ស្រាប់ទៅនៅដើមឆ្នាំ២០២២ ក្រោយសង្រ្គាមនៅអ៊ុយក្រែនបានផ្ទុះឡើង ការវិនិយោគដោយផ្ទាល់ពីបរទេស បានធ្លាក់ចុះថយ ជាបន្តបន្ទាប់។ សង្រ្គាមនៅអ៊ុយក្រែន បានបង្កឲ្យមានវិបត្តិ៣ផ្ទួនៗគ្នា គឺវិបត្តិតម្លៃស្បៀងអាហារ វិបត្តិតម្លៃថាមពល និងវិបត្តិហិរញ្ញវត្ថុ។
លោកអគ្គលេខាធិការអង្គការសហប្រជាជាតិ បានលើកឡើងថា ពិតជាមានហានិភ័យ ទាក់ទិននឹងសន្ទុះនៃការវិនិយោគអន្តរជាតិ។ បញ្ហានេះ អាចនឹងជាឧបសគ្គ ដល់ផែនការវិនិយោគថ្មីៗ ក្នុងវិស័យការអភិវឌ្ឍន៍ប្រកបដោយចីរភាព ដែលជាការវិនិយោគដ៏ចាំបាច់ ដើម្បីចូលរួមដោះស្រាយវិបត្តិអាកាសធាតុ។ គឺបណ្តាប្រទេសកំពុងអភិវឌ្ឍន៍ ដែលរងការប៉ះពាល់ច្រើនជាងគេ ដោយការចុះថយ នៃទំហំវិនិយោគបរទេសដោយផ្ទាល់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ