ក្រុមប្រទេសផលិតប្រេង សម្រេចបន្ថែមការផលិត តែក្នុងចំនួនស្ដួចស្តើងបំផុត ព្រោះបារម្ភពីសេដ្ឋកិច្ចចិន
ក្រុមប្រទេសផលិតប្រេង បានជួបប្រជុំគ្នា កាលពីថ្ងៃព្រសហ្បតិ៍ ទី៥មេសា ដើម្បីសម្រេចដំឡើងការផលិតប្រេង បំពេញតម្រូវការពិភពលោក។ ប្រទេសផលិតប្រេង បានសម្រេចដំឡើងការផលិត តែក្នុងចំនួនមួយតិចតួចបំផុត បើទោះបីជាមានមតិដង្ហើយហៅ ឲ្យប្រទេសទាំងនេះ បន្ថែមចំនួនស្តុកឲ្យច្រើន ដើម្បីទាញតម្លៃប្រេងឲ្យធ្លាក់ចុះមកវិញក៏ដោយ។ បើតាមការវិភាគ គឺក្រុមប្រទេសផលិតប្រេង មានការប្រុងប្រយ័ត្នខ្លាំង ទាក់ទិននឹងសេដ្ឋកិច្ចចិន ដែលកំពុងតែរាំងស្ទះ រអាក់រអួលដោយសារតែការឆ្លងរាលដាលកូវីដ១៩។
ចុះផ្សាយនៅថ្ងៃ៖
ស្តាប់ - ០២:៥៣
ប្រទេសផលិតប្រេងទាំង ១៣ ដែលជាសមាជិក OPEP រួមជាមួយប្រទេសដៃគូ OPEP + បានសម្រេចថា នឹងដំឡើង ការផលិតឲ្យបានសរុប ចំនួន ៤៣២០០០ធុងបារីល ក្នុងមួយថ្ងៃ នៅក្នុងខែមិថុនាខាងមុខ។ នេះគឺជាការដំឡើងការផលិត ដែលស្តួចស្តើងបំផុត ខណៈដែលទីផ្សារប្រេង កំពុងរំជើបរំជួលខ្លាំង ដោយសារតែវិបត្តិសង្គ្រាមនៅអ៊ុយក្រែន ហើយដែលធ្វើឲ្យប្រេងឡើងថ្លៃ។
គួរកត់សំគាល់ថា តម្លៃប្រេងបានបន្តឡើងថ្លៃ បន្ទាប់ពីសហភាពអឺរ៉ុប បានប្រកាសអំពីវិធានការទណ្ឌកម្មលើកទី៦ ទៅលើរុស្ស៊ី។ ពីនេះដល់ដាច់ឆ្នាំ២០២២ អឺរ៉ុបនឹងឈប់ទិញប្រេងរបស់រុស្ស៊ីទាំងអស់ ទាំងប្រេងឆៅ ទាំងប្រេងចម្រាញ់ហើយ។ នៅម៉ោង១២ថ្ងៃព្រហស្បតិ៍ ទី៥មេសា ប្រេងខ្មៅសមុទ្រខាងជើង បានឡើងដល់ ១១១,៨៦ ដុល្លារ ក្នុងមួយធុងបារីល ហើយប្រេងឆៅស្តង់ដាអាមេរិក WTI បានឡើងដល់ ១០៩,៩១ ដុល្លារ ក្នុងមួយធុងបារីល។
លោក Fawad Razaqzada អ្នកវិភាគទីផ្សារប្រេង នៅ City Index បានឲ្យដឹងថា ក្រុមប្រទេសផលិតប្រេងនៅតែបន្ត ប្រុងប្រយ័ត្ន ដោយអនុវត្តវិធានការបង្កើនការផលិត ក្នុងកម្រិតតូច បន្តិចម្តងបន្តិចម្តង បើទោះបីជាបច្ចុប្បន្នប្រេងឡើងថ្លៃខ្លាំង ដោយសារតែទីផ្សារជ្រួលច្របល់ ខ្លាចគ្មានប្រេងក្នុងស្តុកក៏ដោយ។
ដោយឡែក លោក Ipek Ozkardeskaya អ្នកវិភាគនៅ Swissquote បានលើកឡើងថា សេដ្ឋកិច្ចចិនដែលកំពុងរអាក់រអួលខ្លាំង ដោយសារតែវិធានការបិទខ្ទប់បង្ការការឆ្លងរាលដាលកូវីដ គឺជាហេតុផលមួយ ដែលធ្វើឲ្យក្រុមប្រទេសផលិតប្រេងមានការប្រុងប្រយ័ត្ន។ បន្ថែមពីនេះទៀត មូលនិធិរូបិយវត្ថុអន្តរជាតិ បានព្យាករណ៍ទម្លាក់ការកំណើនសេដ្ឋកិច្ចពិភពលោក ដោយសារតែបញ្ហាសង្គ្រាមនៅអ៊ុយក្រែន ទំនិញឡើងថ្លៃ អតិផរណាខ្ពស់ ប៉ះពាល់ដល់ជីវភាពប្រជាជនជាទូទៅ។ ប្រការទាំងនេះ បានធ្វើឲ្យ ក្រុមប្រទេសផលិតប្រេង បារម្ភថាសេដ្ឋកិច្ចពិភពលោក អាចនឹងរាំងស្ទះ ធ្វើឲ្យតម្រូវការប្រេងចុះថយ នៅពេលខាងមុខ។
យ៉ាងណាក៏ដោយ លោក Stephen Innes អ្នកជំនាញទីផ្សារប្រេង នៅ Spi Asset Management បានលើកឡើងថា ការប្រុងប្រយ័ត្នរបស់ក្រុមប្រទេសផលិត ក្នុងការដំឡើងការផលិតគឺវាជ្រុលហួសហេតុពេកហើយ។ ការមិនព្រមបន្ថែមការផលិតឲ្យគ្រប់គ្រាន់ដើម្បីបង្គ្រប់តម្រូវការ គឺវាផ្ទុះពីកម្មវត្ថុតួនាទីរបស់អង្គការក្រុមប្រទេសផលិតប្រេង OPEP ដែលតាមនិយមន័យគឺបង្កើតឡើងដើម្បី សម្រួលដោះស្រាយបញ្ហាតម្លៃប្រេងនេះឯង។ តែទន្ទឹមគ្នានេះ អ្នកជំនាញខ្លះលើកឡើងថា ប្រទេសផលិតប្រេងខ្លះ កុំថាឡើយដល់តែបន្ថែមការផលិត សូម្បីតែផលិតឲ្យគ្រប់កូតាបច្ចុប្បន្នគឺពិបាកណាស់ទៅហើយ ព្រោះគ្មានហេដ្ឋារចនាសម្ព័ន្ធផលិតគ្រប់គ្រាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ