WTO/OMC៖ សកម្មភាពពាណិជ្ជកម្ម ឆ្នាំ២០២១ មានកំណើនលើសពីការរំពឹងទុក
អង្គការពាណិជ្ជកម្មពិភពលោក បានបង្ហាញតួលេខព្យាករណ៍ថ្មី ស្តីពីកំណើននៃសកម្មពាណិជ្ជកម្ម ទូទាំងពិភពលោក សម្រាប់ឆ្នាំ២០២១។ ជាកំណើនដែលអាចមានដល់ទៅ ១០.៨% ពោលគឺវាលើសពីការរំពឹងទុក កាលពីពេលមុន។ អង្គការពាណិជ្ជកម្មពិភពលោក នេះបានថ្លែងអបអរ ចំពោះការស្ទុះឡើងនៃពាណិជ្ជកម្មសម្រាប់ប្រទេសមួយចំនួន តែទន្ទឹមនឹងនេះ អង្គការនេះក៏បានក្រើនរំលឹកផងដែរ អំពីល្បឿនចុះខ្សោយខ្លាំង នៅតាមប្រទេសផ្សេងទៀត ខណៈដែលពួកគេកំពងឆ្លងកាត់វិបត្តិកូវីដ យ៉ាងលំបាកលំបិន។
ចុះផ្សាយនៅថ្ងៃ៖
ស្តាប់ - ០២:៤០
កាលពីខែមីនា អង្គការពាណិជ្ជកម្មពិភពលោក បានគិតរំពឹងថា កំណើនពាណិជ្ជកម្មនៅឆ្នាំ២០២១ អាចមានកម្រឹតត្រឹម៨%។ តែដោយសង្កេតឃើញ របត់នៃការស្ទុះឡើងវិញនៃសកម្មភាពសេដ្ឋកិច្ច នាពេលបច្ចុប្បន្ន អង្គការនេះបានកែប្រែតួលេខព្យាករណ៍ ដោយប៉ាន់ស្មានថា ក្នុងឆ្នាំ២០២១នេះ ពាណិជ្ជកម្មពិភពលោក អាចនឹងមានកំណើត ប្រហែល ១០.៨%។ ចំណែកនៅឆ្នាំ ២០២២វិញ កំណើនអាចមានប្រមាណជា៤.៧%។
កម្រិតកើនឡើងខ្លាំង នៃសកម្មភាពនាំចេញនាំចូល នៅទូទាំងពិភពលោក ក្នុងឆ្នាំ២០២១នេះ គឺទីមួយដោយសារតែឆ្នាំ២០២០កន្លងទៅ វិស័យនេះបានធ្លាក់ចុះជាខ្លាំង ដោយសារតែបញ្ហាវិបត្តិកូវីដ១៩។ តែយ៉ាងណា មួយឆ្នាំក្រោយ សកម្មភាពផលិតនាំចេញ និងការទិញប្រើប្រាស់ បានស្ទុះឡើងខ្លាំងវិញ ជាមួយនឹងការដកចេញវិធានការបិទខ្ទប់នានា អមដោយយុទ្ធនាការចាក់វ៉ាក់សាំងផង។ យោងតាមអ្នកជំនាញ របស់អង្គការពាណិជ្ជកម្មពិភពលោក កម្រិតនៃការកើនឡើងនេះ អាចចុះទាបមកវិញ ចាប់ពីឆ្នាំ២០២២ទៅ វិលទៅរករបត់កំណើន នៅមុនសម័យមានកូវីដ១៩។
ទន្ទឹមគ្នានេះដែរ អ្នកជំនាញបានលើកឡើងថា បើទោះបីសន្ទុះនៃសង្វាក់ផលិតកម្ម ការនាំចេញមានការកើនឡើងគួរឲ្យសង្ឃឹមមែន តែនៅមានវិស័យខ្លះ ស្ថិតក្នុងភាពតានតឹងខ្លាំង ដោយសារតែការផលិតមិនទាន់គ្រប់តាមតម្រូវការ ជាក់ស្តែងដូចជាក្នុងវិស័យផលិតឧបករណ៍ សឺមីកុងឌុចទ័រ ដែលគេត្រូវការចាំបាច់សម្រាប់ ផលិតរថយន្តអគ្គីសនី។
ជាងនេះទៀត អង្គការពាណិជ្ជកម្ម បានអះអាងថា សន្ទុះកំណើនពាណិជ្ជកម្មមានកម្រិតមិនស្មើគ្នាទេ រវាងប្រទេសទាំងអស់។ ជាក់ស្តែងតំបន់ដើមបូព៌ា តំបន់អាមេរិកខាងត្បូង និងទ្វីបអាហ្វ្រិក គឺមានសន្ទុះពាណិជ្ជកម្មខ្សោយបំផុត ទាំងការនាំចេញ និងការនាំចូល។
លោកស្រី Ngozi Okonjo-Iweala នាយិការអង្គការពាណិជ្ជកម្មពិភពលោក បានលើកឡើងថា អសមភាព នៃយុទ្ធនាការចាក់វ៉ាក់សាំង រវាងប្រទេសនីមួយៗ មិនបានជួយដល់ការស្ទុះឡើងនៃវិស័យពាណិជ្ជកម្មទេ។ ខណៈដែលនៅពុំមានវ៉ាក់សាំងចាក់ជូនប្រជាពលរដ្ឋ ប្រទេសមួយចំនួនធំក៏កំពុងប្រឈមខ្លាំងណាស់ដែរ និងការឆ្លងរាលដាលមេរោគទំរង់បំប្លែងខ្លួនថ្មីទៀត ទៅថ្ងៃអនាគត។ លោកស្រីបន្ថែមថា នៅក្នុងឱកាសសន្និសីទសមាជិកអង្គការពាណិជ្ជកម្មពិភពលោក នៅចុងខែវិច្ឆិកាខាងមុខនេះ គេនឹងអាចមូលមតិគ្នាដើម្បីផ្តល់សន្ទុះដល់យន្តការ ផលិតវ៉ាក់សាំងឲ្យបានលឿនបំផុត ព្រោះយុទ្ធនាការចាក់វ៉ាក់សាំង វាគឺកម្លាំងចលករ អូសទាញសន្ទុះពាណិជ្ជកម្មឲ្យរីកលូតលាស់ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ