UN អំពាវនាវ ឲ្យផ្អាកលក់និងផ្អាកចែកចាយកម្មវិធីស៊ើបឈ្លបយកការណ៍ Pegasus
អង្គការសហប្រជាជាតិ បានអំពាវនាវ ឲ្យផ្អាកលក់និងផ្អាកចែកចាយកម្មវិធីស៊ើបឈ្លបយកការណ៍ Pegasus មួយរយៈសិន ហើយត្រូវរង់ចាំទម្រាំទាល់តែ កម្មវិធី Pegasus អាចធានាបាននូវលក្ខខណ្ឌគោរពសិទ្ធិមនុស្ស។ ក្នុងសេចក្តីថ្លែងការណ៍ ផ្សាយនៅថ្ងៃព្រហស្បតិ៍ ទី១២សីហា អ្នកជំនាញអង្គការសហប្រជាជាតិ បានសម្តែងក្តីបារម្ភយ៉ាងខ្លាំង ថា ការប្រើប្រាស់ កម្មវិធីបច្ចេកវិទ្យា Pegasus ដើម្បីស៊ើបឈ្លបយកការណ៍ គឺធ្វើឲ្យប៉ះពាល់ដល់ប្រជាធិបតេយ្យ និងបំផ្លាញសិទ្ធិមនុស្ស ។
ចុះផ្សាយនៅថ្ងៃ៖
ស្តាប់ - ០២:២១
ក្នុងសេចក្តីថ្លែងការណ៍ ដែលទីភ្នាក់ងារព័ត៌មានបារាំងAFP ទទួលបាន គឺ អង្គការសហប្រជាជាតិ បញ្ជាក់ថា «ការលួចឈ្លបការណ៍ ធ្វើឡើងតាមរយៈកម្មវិធីបច្ចេកវិទ្យា Pegasus គឺបះពាល់ដល់ជីវិតឯកជន ខូចខាតដល់សេរីភាព-សិទ្ធបញ្ចេញមតិ និង ធ្វើឲ្យជីវិតមនុស្សជាច្រើន ត្រូវឋិតនៅក្នុងសភាពគ្រោះថ្នាក់។ មិនតែប៉ុណ្ណោះ គឺ Pegasus ធ្វើឲ្យខូចដល់លទ្ធិប្រជាធិបតេយ្យ ខូចសន្តិភាព ប៉ះពាល់សន្តិសុខ និងកិច្ចសហការអន្តរជាតិ។»
សេចក្តីបញ្ជាក់របស់អ្នកជំនាញអង្គការសហប្រជាជាតិនេះ គឺធ្វើឡើងបន្ទាប់ពី អង្គការអ្នកកាសែតគ្មានព្រំដែន និងអង្គការសិទ្ធិមនុស្សជាងច្រើន បានប្តឹងផ្តល់ទៅ អង្គការសហប្រជាជាតិ។ រឿងអាស្រូវឈ្លបការណ៍ Pegasus ផ្ទុះនៅពាក់កណ្តាលខែកក្កដា គឺបែកធ្លាយតាមរយៈការស៊ើបអង្គេត របស់អង្គភាពសារព័ត៌មានអន្តរជាតិ ចំនួន១៧ ហើយគេរកឃើញថា បច្ចេកវិទ្យាឈ្លបយកការណ៍ Pegasus បានតាមដានលួចស៊ើបការណ៍តាមទូរសព្ទ ទៅលើទូរសព្ទដៃរបស់អ្នកកាសែត ចំនួន ១៨០ នាក់, ទូរសព្ទដៃរបស់អ្នកនយោបាយធំៗ អ្នកដឹកនាំប្រទេស ទាំងប្រុសទាំងស្រី ប្រមាណ ៦០០ នាក់, សកម្មជនសិទ្ធមនុស្ស យ៉ាងហោច ៨៥នាក់ និងប្រធានក្រុមហ៊ុនឯកជនធំៗ ចំនួន ៦៥ មកពីប្រទេសផ្សេងៗ។
ក្តីបារម្ភខ្លាំងចំពោះអនាគតប្រជាធិបតេយ្យ គឺគេព្រួយខ្លាចក្រែងថា រដ្ឋអំណាចមួយចំនួន ប្រើកម្មវិធីនេះ តាមដានអ្នកកាសែតនិងសកម្មជនការពារសិទ្ធមនុស្ស។ ហេតុដូច្នេះ ទើបមន្ត្រីអ្នកជំនាញអង្គការសហប្រជាជាតិ បានផ្តាំផ្ញើឲ្យបណ្តារដ្ឋាភិបាលនានា ថា ប្រទេសនីមួយៗមានកាពត្វកិច្ចត្រូវតែធានាថា «ក្រុមហ៊ុន អ៊ីស្រាអែល NSO ជាម្ចាស់កម្មវិធីស៊ើបឈ្លបយកការណ៍ Pegasus ឬក្រុមហ៊ុនស្រដៀងគ្នានេះ មិនបានលក់ ឬមិនបានចុះកិច្ចសន្យាលក់ ឬក៏ផ្ទេរបច្ចេកវិទ្យាកម្មវិធីឈ្លបការណ៍របៀបដូច្នេះ ទៅឲ្យរដ្ឋ ឬក្រុមហ៊ុនស្និទ្ធនឹងប្រទេសណាមួយ ដើម្បីអនុញ្ញាតឲ្យ អាជ្ញាធរ យកទៅប្រើ ជាមធ្យោបាយបំពានសិទ្ធិមនុស្សឡើយ។»
អ្នកជំនាញអង្គការសហប្រជាជាតិ ក៏ជំរុញឲ្យ អ៊ីស្រាអែល និងក្រុមហ៊ុន NSO របស់អ៊ីស្រាអែល បញ្ឈប់ការអនុវត្តទម្លាប់ចាស់ ហើយត្រូវចាត់វិធានការទប់ស្កាត់ ជាដាច់ខាត ដើម្បីធានាដល់សិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ