សហរដ្ឋអាមេរិក និងចិនបន្តកិច្ចចរចាដើម្បីកុំឲ្យភាពតានតឹងក្លាយជាជម្លោះ
សហរដ្ឋអាមេរិក និងចិនបានប្រាប់ឲ្យដឹងក្នុងថ្ងៃអាទិត្យ ទី១៧ កញ្ញាថា ទីប្រឹក្សាសន្តិសុខជាតិអាមេរិកលោកជេក ស៊ូលីវ៉ាន់ និងប្រមុខការទូតចិនលោកវ៉ាង យីបានជួបគ្នាក្នុងប្រទេសម៉ាល់ត៍រយៈពេល ២ថ្ងៃពីថ្ងៃសៅរ៍ ទី១៦ដល់ថ្ងៃអាទិត្យ ទី១៧ កញ្ញា។ ជំនួបនេះមានរយៈពេល ១២ម៉ោង និងបានរៀបចំក្នុងពេលដែលប្រទេសមហាអំណាចសេដ្ឋកិច្ចទាំងពីរកំពុងបន្តព្យាយាមកាត់បន្ថយភាពតានតឹងរវាងគ្នា។
ចុះផ្សាយនៅថ្ងៃ៖
ស្តាប់ - ០៣:០៣
![អាមេរិកនិងចិន ជួបគ្នានៅប្រទេសម៉ាល់](https://s.rfi.fr/media/display/2ec873f2-560c-11ee-b3a9-005056a90321/w:980/p:16x9/AP23261280074788.jpg)
នៅក្នុងសេចក្តីប្រកាសព័ត៌មានដាច់ដោយឡែកពីគ្នា សហរដ្ឋអាមេរិកតាមរយៈសេតវិមាន និងចិនតាមរយៈក្រសួងការបរទេសបានលើកឡើងពីកិច្ចពិភាក្សាត្រង់ទៅត្រង់មក សំខាន់ និងប្រកបដោយក្តីស្ថាបនារវាងលោកជេក ស៊ូលីវ៉ាន់ និងលោកវ៉ាង យី។ តែសេចក្តីប្រកាសព័ត៌មានដដែលនេះមិនបានបញ្ជាក់ពីប្រធានរឿងដែលទីប្រឹក្សាសន្តិសុខជាតិអាមេរិក និងប្រមុខការទូតចិនបានលើកយកទៅជជែកទេ។ ទោះបីជាភាគីទាំងពីរមិនបានទម្លាយប្រធានរឿងដែលជជែកក៏ដោយក៏គេដឹងថា ប្រធានរឿងចម្រូងចម្រាសរវាងអាមេរិក និងចិនមានច្រើនតាំងពីក្នុងវិស័យសេដ្ឋកិច្ច វិស័យការពារ និងវិស័យការបរទេស។
ក្រៅពីនេះ នៅមានប្រធានបទក្តៅ និងរស៊ើបខ្លាំងមួយចំនួនដូចជាបញ្ហាសមុទ្រចិនខាងត្បូង សមុទ្រចិនខាងកើត ឬមួយបញ្ហាតៃវ៉ាន់ជាដើម។ នៅក្នុងការទាក់ទងរវាងកងទ័ពអាមេរិក និងកងទ័ពចិនត្រូវបានលោកជេក ស៊ូលីវ៉ាន់ថ្លែងប្រាប់ក្រុមអ្នកកាសែតថា មានសញ្ញាដែលនឹងអាចភ្ជាប់ឡើងវិញ។ តែលោកវ៉ាង យីមិនបានបញ្ជាក់លើការថ្លែងរបស់ទីប្រឹក្សាសន្តិសុខជាតិអាមេរិកលោកជេក ស៊ូលីវ៉ាន់រូបនេះទេ។ ដោយឡែក ប្រមុខការទូតចិនលោកវ៉ាង យីបាននិយាយពីបញ្ហាតៃវ៉ាន់ដោយបញ្ជាក់ច្បាស់ៗក្នុងន័យព្រមានថា រឿងតៃវ៉ាន់ជាខ្សែបន្ទាត់ក្រហមដែលមិនត្រូវដើរឆ្លងកាត់ជាដាច់ខាត។
គេអាចនិយាយបានជារួមថា ជំនួបរវាងទីប្រឹក្សាសន្តិសុខជាតិអាមេរិក និងប្រមុខការទូតចិនក្នុងប្រទេសម៉ាល់ត៍ពេលនេះមិនបានទទួលលទ្ធផលអ្វីជាដុំកំភួនទេ។ ផ្ទុយទៅវិញ ជំនួបនេះបានធ្វើឡើងនៅក្នុងក្របខណ្ឌនៃសេរីដោះដូរកម្រិតកំពូលថ្នាក់ក្រសួងរវាងប្រទេសទាំងពីរក្នុងគោលដៅព្យាយាមកាត់បន្ថយភាពរវាងគ្នា។ អ្វីដែលក្រុងវ៉ាស៊ីនតោន និងក្រុងប៉េកាំងចង់បានតាមរយៈជំនួបជាហូរហែកន្លងមក គឺបញ្ជៀសកុំឲ្យភាពតានតឹងប្រែក្លាយទៅជាជម្លោះត ទល់គ្នា។ គួររម្លឹកថា លោកជេក ស៊ូលីវ៉ាន់ និងលោកវ៉ាង យីធ្លាប់ជួបគ្នាម្តងក្នុងប្រទេសអូទ្រីសកាលពីខែឧសភា។
ក្រៅពីជំនួបចំនួនពីរដងរវាងលោកជេក ស៊ូលីវ៉ាន់ និងលោកវ៉ាង យីនៅក្រៅទឹកដីអាមេរិក និងចិន មានថ្នាក់ដឹកនាំក្នុងរដ្ឋបាលអាមេរិកចំនួន ៣រូបបានធ្វើដំណើរទៅចិននាប៉ុន្មានខែចុងក្រោយនេះ គឺរដ្ឋមន្រ្តីពាណិជ្ជកម្មលោកស្រីជីណា រេម៉ុនដូ រដ្ឋមន្រ្តីការបរទេសលោកអង់តូនី ប៊្លីនកិន និងរដ្ឋមន្រ្តីហិរញ្ញវត្ថុលោកស្រីចានែត យេលែន។ គេសង្ឃឹមថាពីពេលនេះទៅដំណាច់ឆ្នាំ ២០២៣ គឺអាចមានជំនួបថ្នាក់ប្រធានាធិបតីរវាងលោកចូ បៃដិន និងលោកស៊ី ជីនពីង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ