ឆ្នាំថ្មី មេដឹកនាំធំៗលើពិភពលោក ប្រកាសបំពាក់បំប៉នបង្កើនអាវុធ
យប់ឆ្លងឆ្នាំ ប្រទេសជាច្រើនបាញ់កាំជ្រួចអបអរឆ្នាំថ្មី តែនៅតំបន់ហ្គាហ្សា ក្រុមហាម៉ាសបានបាញ់គ្រាប់រ៉ូក្កែតដាក់លើអ៊ីស្រាអែល គឺម៉ោង១២យប់ គ្រាប់ធ្លាក់នៅប៉ែកខាងត្បូងអ៊ីស្រាអែល ហើយមួយនាទីក្រោយមក គ្រាប់ធ្លាក់នៅក្រុង តែល-អាវីវ។ ក្រុមកម្លាំងហាម៉ាស ប្រកាសតាមបណ្តាញសង្គមថា នេះគឺការសងសឹកឆ្លើយតបនឹងទង្វើហិង្សារបស់អ៊ីស្រាអែល ដែលបានប្រព្រឹត្តទៅលើពលរដ្ឋនៅតំបន់ហ្គាហ្សា។
ចុះផ្សាយនៅថ្ងៃ៖
ស្តាប់ - ០៤:០០
រាត្រីឆ្លងឆ្នាំ ពលរដ្ឋអ៊ីស្រាអែលនៅក្រុងតែល-អាវីវ ភិតភ័យរត់រកកន្លែងសុវត្ថិភាព។ ទាំងក្រុងតែល-អាវីវ និងក្រុងហ្សេរូសាឡឹម ស្ងប់ស្ងាត់និងងងឹតជាងបុណ្យឆ្លងឆ្នាំ ខុសពីសព្វមួយដង។ គួរបញ្ជាក់ថា ការបាញ់រ៉ូក្កែតរបស់ក្រុមហាម៉ាស់នៅពេលយប់ឆ្លងឆ្នាំនេះ គឺបន្ទាប់ពីពេលថ្ងៃ អ៊ីស្រាអែល វាយប្រហារ បាញ់គ្រាប់ផ្លោង សម្លាប់មនុស្សនៅហ្គាហ្សា ប្រមាណ ជិត ៥០ នាក់។ នេះបើតាមទិន្នន័យរបស់អាជ្ញាធរសុខាភិបាលហាម៉ាស។
ទាំងក្រុមកងទ័ពនិងរដ្ឋាភិបាលអ៊ីស្រាអែល ក្រោយពីទទួលបានជំនួយថ្មី១៤៧,៥លានដុល្លារពីសហរដ្ឋអាមេរិក គឺសុទ្ធតែបានបញ្ជាក់ព្រមគ្នាថា សង្គ្រាមនេះនឹងបន្តអូសបន្លាយយូរតទៅទៀត ក្នុងឆ្នាំថ្មី ២០២៤។ នាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ ធ្លាប់បានសន្យាកាលពីសប្តាហ៍មុនដាច់ឆ្នាំ ថា ត្រូវតាមកម្ទេចក្រុមហាម៉ាស រំលាយប្រដាប់អាវុធពួកហាម៉ាស និង កែទម្រង់សង្គមប៉ាឡេស្ទីន ហើយនិងយកតំបន់ហ្គាហ្សា មកត្រួតត្រាជាថ្មី។
ស្តីពីសង្គ្រាមឈ្លានពានអ៊ុយក្រែនវិញ ចំពោះប្រទេស រុស្ស៊ី គឺមិនដកថយក្រោយជាដាច់ខាត។ ប្រធានាធិបតីរុស្ស៊ី លោក វ្ល៉ាឌីមៀ ពូទីន អះអាងនៅក្នុងឱកាសថ្លែងសារឆ្លងឆ្នាំថា មានតែត្រូវបោះពួយរុលកងទ័ពទៅមុខ គឺដាច់ខាត គ្មានផ្លូវថយក្រោយឡើយ។ ចំណែក អ៊ុយក្រែន វិញ លោកប្រធានាធិបតី វ៉ូឡូឌីមៀរ ហ្សេឡេនស្គី ថា ឆ្នាំថ្មី ២០២៤ អ៊ុយក្រែន នឹងបង្កើនអាវុធ បំពាក់បំប៉ន់បន្ថែម យ៉ាងហោច ក៏យន្តហោះដ្រូន មិនតិចជាង ១ លានគ្រឿងនោះឡើយ ហើយនៅមានជំនួយយន្តហោះចម្បាំង ប្រភេទ«អេហ្វ១៦» និងគ្រឿងសម្ភារៈចម្បាំងផ្សេងទៀត ដែលជាជំនួយយោធារបស់សម្ព័ន្ធមិត្តប្រទេសបច្ឆិមលោក។
នៅប្រទេសបារាំង ក្នុងឱកាសថ្លែងសារទៅកាន់ប្រជាជាតិ ប្រធានាធិបតីបារាំង លោក អេម៉ានុយអែល ម៉ាក្រុង បានប្ដេជ្ញាចិត្តយ៉ាងជាក់ច្បាស់ ត្រូវបំពាក់អាវុធ ពង្រឹងប្រទេសជាតិ ប្រឈមមុខនឹងពិភពលោកដែលក្រឡាប់ចក្រ។ ការពង្រឹងជាតិ បង្កើនអាវុធ ត្រូវលោកប្រមុខរដ្ឋបារាំង ប្រើពាក្យនេះ ជាច្រើនដង នៅក្នុងសុន្ទរកថារយៈប្រមាណ១៣នាទី។ នេះគឺដើម្បីការពារសន្តិសុខសុវត្ថិភាពជនស៊ីវិល ហើយនិង ពង្រឹងសេដ្ឋកិច្ច ដើម្បីពង្រឹងជំនួយសង្គម និងផ្គង់ផ្គត់វិស័យអប់រំ។ ការបំពាក់បំប៉ន់ពង្រឹងអាវុធនេះ គឺសំដៅដែរ អំពីពង្រឹងរដ្ឋ ពង្រឹងសង្គម ពង្រឹងសេដ្ឋកិច្ច ពង្រឹងបច្ចេកវិទ្យា វិទ្យាសាស្ត្រ។ មួយចំណែកទៀត គឺ ប្រមុខរដ្ឋបារាំង អះអាងពីជំហរ ពង្រឹងសហភាពអឺរ៉ុប ដើម្បីរក្សាសន្តិភាព ហើយនិងត្រូវបន្តគាំទ្រអ៊ុយក្រែន ទប់ទល់នឹងកម្លាំងឈ្លានពានរបស់រុស្ស៊ី។
ចំណែកនៅអាស៊ីវិញ ក្នុងសុន្ទរកថាអបអរឆ្នាំថ្មី ប្រធានាធិបតី ស៊ី ជីនពីង អះអាងព្រមានថា ចិននិងតៃវ៉ាន់អាចនឹងរួបរួមគ្នាបានយ៉ាងជាក់ច្បាស់។ លោក ស៊ី ជីនពីង បានប្រកាសថា ពលរដ្ឋទាំងពីរខាងត្រូវតែភ្ជាប់គ្នាដោយគោលដៅតែមួយ និង ចែករំលែកគ្នាជ្រកក្រោមភាពត្រចះត្រចង់ នៃវាសនាជាតិចិនតែមួយ។ នាពេលកន្លងទៅ រដ្ឋអំណាចចិន ក៏មិនដែលច្រានចោលពីលទ្ធភាពសង្គ្រុបយកតៃវ៉ាន់ដោយកម្លាំងយោធា នោះឡើយ។
នៅកូរ៉េខាងជើង ក្នុងថ្ងៃឆ្លងឆ្នាំ កាសែតរដ្ឋ ផ្សាយប្រសាសន៍របស់ថ្នាក់ដឹកនាំ គីម ជុងអ៊ុន ដែលអះអាងថា ក្នុងករណីមានសង្គ្រាមផ្ទុះឡើង គឺកងទ័ពយោធារបស់កូរ៉េខាងជើង អាចនឹងមានសមត្ថភាពកម្ទេច កូរ៉េខាងត្បូង និង សហរដ្ឋអាមេរិក បាន។ ជាការឆ្លើយតប នៅថ្ងៃចន្ទ ដើមឆ្នាំថ្មី ប្រធានាធិបតីកូរ៉េខាងត្បូង លោក យូន ស៊ុកយោល បានសន្យាចំពោះប្រជាជាតិថា នឹងសហការជាមួយសហរដ្ឋអាមេរិក ដើម្បីរៀបចំប្រព័ន្ធការពារប្រទេស ទប់ទល់នឹងការគំរាមកំហែងរបស់របបក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ