គណបក្សភ្លើងទៀនស្នើឲ្យសមត្ថកិច្ចវែកមុខអ្នកចេញលិខិតគំរាមចាប់ខ្លួនលោក រ៉ុង ឈុន
គណបក្សភ្លើងទៀនស្នើឲ្យអាជ្ញាធរមានសមត្ថកិច្ចវែកមុខអ្នកដែលចេញលិខិតអណាមិកគំរាមចាប់ខ្លួន លោក រ៉ុង ឈុន លោក ជា មុន្នី និងថ្នាក់ដឹកនាំគណបក្សជំទាស់នេះសរុបជិត២០រូប។ ការស្នើឲ្យវែកមុខជនអនាមិកនោះ គឺដើម្បីជៀសវាងការចលាចលសង្គម។ នេះបើតាមអ្នកនាំពាក្យគណបក្សប្រាប់វិទ្យុបារាំងអន្តរជាតិRFI នៅថ្ងៃអាទិត្យនេះ ដោយយល់ថា ប្រសិនបើមានការចង់ចាប់ខ្លួនថ្នាក់ដឹកនាំគណបក្សនេះមែន នោះទំនងមិនមានការបញ្ចេញលិខិតគំរាមជាមុនយ៉ាងដូច្នេះឡើយ។
ចុះផ្សាយនៅថ្ងៃ៖
ស្តាប់ - ០១:៥៨
លោក គីមសួរ ភីរិទ្ធ អ្នកនាំពាក្យគណបក្សភ្លើងទៀន យល់ថា លិខិតអនាមិកគំរាមចាប់ខ្លួនថ្នាក់ដឹកនាំគណបក្សនេះដែលត្រូវបានគេបញ្ជួនទៅកាន់មនុស្សមួយចំនួនរបស់គណបក្សជំទាស់នេះ គឺមានចេតនាបំភិតបំភ័យលើគណបក្សភ្លើងទៀន។
បើតាមលិខិតដែលគេផ្សព្វផ្សាយនៅថ្ងៃទី១១ ខែសីហានោះ គឺមានគំរាមចាប់ខ្លួន លោក រ៉ុង ឈុន អនុប្រធានបក្សភ្លើងទៀន លោក ជា មុនី មន្ត្រីជាន់ខ្ពស់ និងសកម្មជនគណបក្សនេះមួយចំនួនដូចជាលោក ថាន់ ណារិន និងលោក ផុន សុភា ជាដើម ដែលពួកគេកំពុងរស់នៅក្នុងប្រទេសកម្ពុជា។ ចំណែកសកម្មជនគណបក្សនេះចំនួន៤នាក់ទៀត ដែលមានឈ្មោះក្នុងលិខិតនោះដែរ ដូចជា លោក អេង ស្រួយ លោក ប៊ុន ខេត លោក លី រី លោក វង រុន្នី និងលោក គឹម សុភា ត្រូវបានចាប់ខ្លួនដាក់ពន្ធនាគារ ក្នុងអំឡុងខែកក្កដា ក្រោមការចោទថា ញុះញង់ឲ្យពលរដ្ឋគូសសន្លឹកឆ្នោតចោល។
លោក គីមសួរ ភីរិទ្ធ ស្នើឲ្យអាជ្ញាធរមានសមត្ថកិច្ចវែកមុខជនអនាមិកនោះ គឺដើម្បីជៀសវាងការចលាចលសង្គម។ ប៉ុន្តែយល់ថា ប្រសិនបើគេចង់ចាប់ខ្លួនថ្នាក់ដឹកនាំគណបក្សនេះមែន នោះទំនងមិនមានការបញ្ចេញលិខិតគំរាមជាមុនយ៉ាងដូច្នេះឡើយ។
លោក ខៀវ សុភ័គ អ្នកនាំពាក្យក្រសួងមហាផ្ទៃ ក៏បានបញ្ជាក់ថា សមត្ថកិច្ចនឹងទុកឲ្យជនអនាមិកចេញលិខិតគំរាមសកម្មជននយោបាយបែបនេះឡើយ ដោយអាជ្ញាធរក៏គិតពីបញ្ហាចលាចលសង្គមដែរ។ តែថាមកដល់ពេលនៅមិនទាន់កំណត់មុខសញ្ញាជនដែលចេញលិខិតគំរាមចាប់ខ្លួនមន្ត្រីបក្សប្រឆាំងនេះនៅឡើយ។
បច្ចុប្បន្នមានមន្ត្រីគណបក្សភ្លើងទៀនយ៉ាងហោចណាស់ចំនួន៥នាក់ សម្រេចរត់ភៀសខ្លួនចេញពីប្រទេសកម្ពុជា ព្រោះអះអាងថាបារម្ភពីសុវត្ថិភាព។ នៅក្នុងនោះ ២រូប បានចាកចេញគណបក្សប្រជាជនកម្ពុជា បន្ទាប់ពីបានចុះចូលរយៈពេលខ្លី ដូចជា លោក គង់ រ៉ៃយ៉ា និង លោក គង់ ជិ អនុប្រធានគណបក្សភ្លើងទៀនខេត្តព្រះសីហនុ។ អ្នកទាំងពីរបានភៀសខ្លួនទៅក្រៅប្រទេសបានអះអាងថា ការដែលពួកគេព្រមចុះចូលជាមួយគណបក្សប្រជាជនកម្ពុជាកន្លងមកដើម្បីជៀសវាងការចាប់ខ្លួន តែអះអាងថា ពួកគេមិនផ្លាស់ប្តូរឆន្ទៈនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ